CIT-U Baby Wildcats mipakurat sa UV Baby Lancers sa CESAFI

CEBU, Philippines — Ang Cebu Institute of Technology-University (CIT-U) Baby Wildcats milusad og dalaygong resbak human malubong og 18 puntos sa first half aron pahagbaon ang kanhi way pildeng University of the Visayas (UV) Baby Lancers, 65-61, sa Cebu Schools Athletic Foundation, Inc. (CESAFI) Season 24 basketball tournament kagahapong adlawa didto sa Cebu Coliseum.

Nabiyaan og layo laayong gintang sa iskor nga 30-48 sa naghinapos nga bahin sa ikaduhang kuwarter, ang Baby Wildcats mikadlit og pito ka sagunson nga puntos sa wala pa mipadayon sa nagkayo nilang ratsada human sa halftime break aron tablahon ang iskor, 54-54, padung sa pinal nga 10 minutos.

Gitiwasan og kulata sa Baby Wildcats ang Baby Lancers sa katapusang kuwarter diin sila miposte og nuybe puntos nga labaw, 64-55, sa nahibling dos minutos aron ibulsa ang makapakurat nilang daog.

Si Kieff Russel Suarez mikadlit og 18 puntos samtang sila si Daniel Chase Mapula ug Ryko John Batuigas parehong mirehistro og double-double sa dihang gitabla sa Baby Wildcats ang ilang rekord ngadto sa 2-2.

Si Mapula mipupo og 17 puntos, 14 ka rebounds, usa ka assist ug upat ka steals, samtang si Batuigas mihipos sab og 17 puntos uban ang 11 ka rebounds.

Si Christophelcian Abella maoy bugtong double-digit scorer uban ang 17 puntos, pito ka rebounds, usa ka assists ug tulo ka steals alang sa Baby Lancers, kansang tulo ka sagunson nga daog naputol.

Sa aksiyon niadtong Sabado, ang University of Cebu (UC) Webmasters migamit na sab og balanseng ataki aron pakagingon ang University of Southern Philippines Foundation (USPF) Panthers, 60-47, ug angkonon ang solong liderato sa college division bitbit ang perpektong 3-0 nga marka.

Gawas sa maanindot nga dagan sa ilang opensa, ang Webmasters mangtas sab sa rebounding diin ilang gilat-an ang Panthers, 66-33.

Sa juniors division, si Froilan Maglasang mikolekta og 17 puntos, usa ka rebound, upat ka assists ug tulo ka steals samtang si Coriantumr Cabantog miamot og 15 puntos, walo ka rebounds ug duha ka blocks sa dihang gipayaka sa two-time defending champion Sacred Heart School-Ateneo de Cebu (SHS-AdC) Magis Eagles pummeled the slumping University of Cebu Lapu-Lapu and Mandaue (UCLM), 82-67, aron inaton ang ilang baraha ngadto sa 2-1.