CEBU, Philippines — Ang Datu Lapu-Lapu Masonic Lodge No.347 Inc. inabagan sa Mactan Island Golf Course mopahigayon og "Swing for a Cause", usa ka charity golf tournament nga gikatakda karong Biyernes, Oktubre 18, didto sa MIGC sa Mactan Benito Ebuen Air Base, dakbayan sa Lapu-Lapu City.
Makadani nga premyo ang gitagana alang niadtong maka-iskor og hole-in-one. Kini mao ang brand new Toyota Raize sa hole No.13, Honda Rebel 500 sa hole No.9, ug P50,000 cash sa hole No.2, 5, 12, ug 14.
Ang kompetisyon magsubay og modified stableford scoring system. Matag team langkoban og upat lamang ka players apan ang iskor lamang sa tulo ang iphon.
Adunay individual ug team awards alang sa lowest gross ug lowest net ingon man sa mga kampiyon ug runner-up sa Division A, B, ug C.
Nagkantidad ang rehistrasyon og P3,500 matag player apil na niini ang green fee, caddies fee, giveaways (Aquaflask, umbrella, ug arm sleeves), raffles prizes, ug dinner ug P2,000 matag team. Adunay dugang bayad matag team aron mo-qualify sa team awards.
Ang kita ning kalihukan alang sa mahinungdanon kawsa nga gipaluyohan sa Celjem Construction and Development Corporation, ARQ Builders, Chambre Hotel Mactan, QM Builders, ug Misibis Bay-Cagragay Island gamiton alang sa nagkadaiyang mga programa sa Datu Lapu-Lapu Lodge No.347 ngadto sa komunidad nga buot nilang pagaserbisyohan.
Alang sa dugang impormasyon, mahimong mokontak sa MIGC hotline (032) 888-6613, 09272294465 o 0917152773.