CEBU, Philippines — Ang defending champion TNT Tropang Giga ug ang Barangay Ginebra Kings parehong nagtinguha nga moposte og 2-0 nga bentaha batok sa tagsa-tagsa nila ka mga karibal sa Game 2 sa best-of-seven PBA Governors' Cup semifinals karong adlawa didto sa Smart Araneta Coliseum sa Quezon City.
Sangkaon sa Tropang Giga ang Rain or Shine Elasto Painters sa alas-5 sa gabii, samtang ang Gin Kings makigharong sa San Miguel Beermen sa alas 7:30 sa gabii. Giunhan sa TNT ang E-Painters, 90-81, niadtong Miyerkules sa gabii didto sa PhilSports Arena sa Pasig City. Si Rondae Hollis-Jefferson maoy nangu sa Tropang Giga uban ang 26 puntos, 13 ka rebounds, ug siyam ka assists. Mao sab ang gibuhat sa Gin Kings nga mihubog sa igsoon nilang koponan nga Beermen, 112-105, pagsugod sa ilang serye.
Si Justin Brownlee ang mibandera sa Gin Kings ngadto sa kadaogan human mipaulbo og 33 puntos, 20 niini iyang gibubo sa ikatulong kuwarter.
Ang Tropang Giga ug ang Gin Kings naglaraw nga usban og parot ang ilang mga kaatbang apan angayan silang mangandam sa pagresbak sa E-Painters ug Beermen nga naglungot-lungot nga tablahon dayon ang serye.