CEBU, Philippines — Ang Cebu Eastern College (CEC) Dragons dali nga namawi sa miagi nilang kaparotan ug gipahimungtan sa ilang kapungot ang Don Bosco Technical College (DBTC) Greywolves, 78-55, sa Cebu Schools Athletic Foundation, Inc. (CESAFI) Season 24 basketball tournament kagahapong adlawa didto sa Cebu Coliseum.
Si Lybron James Lamo mipabuhagay na sab og eksplosibong opensiba. Mipabuto siya og 23 puntos uban ang lima ka rebounds, upat ka assists ug duha ka steals aron tabangan ang Dragons nga makarekober sa 85-99 nilang kapildihan sa mga kamot sa University of the Visayas (UV) Baby Lancers niadtong Oktubre 1.
Midugang si Louie Jay Estorba og 16 puntos, duha ka rebounds, duha ka assists ug duha ka steals samtang si Reyvene Arobo mipupo og 12 puntos ug 12 ka rebounds alang sa Dragons, nga nagsandig sa bagsik nilang ataki sa second half aron lat-an ang Greywolves ug magpabilin sa kinatas-ang dapit sa juniors division standings bitbit ang 4-1 win-loss rekord.
Abante lamang og siyete puntos sa halftime, 29-22, ang Dragons miabli sa ikatulong kuwarter pinaagi sa nagkayong 18-5 rally nga nagtukmod kanila ngadto sa 24 puntos nga demolisyon sa Greywolves.
Sila si James Plano ug Camelson Paul Abangan nagkumbinar og 23 puntos, 14 ka rebounds ug tulo ka assists apan way nahimo gumikan kay ang Greywolves nakatilaw sa ikaduha nilang pilde sud sa tulo ka duwa.
Sa laing sangka, sila si Ryko John Batuigas ug Kieff Russel Suarez mikuha og atensiyon sa dihang ang Cebu Institute of Technology-University (CIT-U) Baby Wildcats mipakurat sa University of Cebu Lapu-Lapu and Mandaue (UCLM), 70-65, alang sa una nilang daog.
Si Batuigas mitagak og 20 puntos, unom ka rebounds, upat ka assists ug usa ka steal samtang si Suarez mitimbre og 15 puntos, upat ka rebounds, lima ka assists ug unom ka steals alang sa Baby Wildcats nga madasigong mipapas sa 10 puntos nilang alkansi, 19-29, sa tunga-tugang bahin sa ikaduhang kuwarter aron patikalbongon ang UCLM.
Biya gihapon og singko puntos human sa first half, 32-37, ang Baby Wildcats milusad og nagkayong 11-0 rally aron ilogon ang labaw, 49-43, sa naghinapos nga bahin sa ikatulong kuwarter.
Human sa 51-51 nga panagtabla, ang Baby Wildcats milabay og makusog nga suntok sa engdame aron seguradoon ang ilang kadaogan uban ang 69-60 nga bentaha sa hilimatyong segundos.
Si Kent Noguera mitampo og 10 puntos alangt sa Baby Wildcats, nga mipakgang sa duha ka sagunson nilang pilde.
Si Prince Mallorca miharos og 20 puntos, 17 ka rebounds, duha ka assists ug tulo ka steals apan nakawang ang impresibo niyang salida kay ang UCLM natagak sa 1-2.