CEBU, Philippines — Sila si Mark Kevin Revilla ug Joy Anne gibayaw nga mga kampiyon sa 21-kilometer category sa Heroes Run 2024 kagahapon didto sa Waterfront-Cebu City Hotel and Casino sa Barangay Lahug.
Ang 28-anyos nga si Revilla, lumad gikan sa Barangay Sapangdaku ug sakop sa Gealon Racing Team, mipatak og usa ka oras, 17 minutos, ug 14 segundos aton langkaton ang titulo sa men's 21K. Si Neil Labajo mitapos nga ikaduha sa oras nga 1:23.04 samtang si Wellsmark Sevillina nalandig sa ikatulong dapit sa oras nga 1:23.25.
Sa women's 21K, si Joy Anne sa dakbayan sa Lapu-Lapu ang labing paspas. Iyang gihuman ang makutas nga lumba sud sa usa ka oras ug 53 minutos.
Si Ana Sheina Nombrado ang miangkon sa ikaduhang luna sa oras nga 1:55.42 samtang sila si Jenny Sia Gutang (1:56.44), Justin Aspacio (2:02.01) ug Jessa Arenella (2:04.18) ang mi-okupar sa ikatulo ngadto sa ikalimang puwesto.
Lain pang duha ka mga pambato sa Gealon Racing Team nga sila si Kelvin Boyles ug Hazel Caraballe ang midominar sa 10K nga distansiya.
Si Boyles naghari sa men s sa oras nga 39 minutos ug 51 segundos ug gisundan kini nilang Ian Simbajon (39:52) ug Ritchie Bunggat (43:58).
Gikoronahang rayna sa women's 10K si Caraballe sa oras nga 49:55. Mipahiluna sa ikaduha ug ikatulong dapit sila si Eugene Calumba (57:30) ug Meriel Saga (58:20).
Ang ubang Top 3 finishers mao sila si Jerome Tuada (17:54), Kirby Aclan (17:58) ug Archie Camaong (19:30) sa men's 5K, George Laurente (28:24), Razel Nara (29:30) ug Scarlet Orbase (29.38) sa women's 5K, Albert Menardo (10:38), Steve Vladener Restauro (10:47), ug Rolando Magno (11:52) sa men's 3K, ug Melanie Bamba (13:50), Ann Apyag (21:24), ug Charez David (21:26) sa women's 3K.
I would just like to thank everyone who joined the event. Everyone here is a hero in their own right because by joining here, they are also able to help fellow heroes that are in the Naval Reserve Center, matud pa ni event organizer Marvin Conson.