CEBU, Philippines — Lab-as pang milampos pagdepensa sa iyang trono, si Melvin Jerusalem naglantaw dayon ngadto sa mas lisud nga hagit.
Kon siya maoy pabut-on, si Jerusalem nagkanayon nga gusto niyang sangkaon sunod ang way pildeng WBA Super minimumweight champion nga si Thammanoon Niyomtrong sa Thailand sa usa ka unification bout.
"Amo plano puhon is unification sa Thai champion kon mahatagan og chance," matud pa sa 30-anyos nga pambato sa ZIP/Sanman Boxing Gym.
Si Jerusalem miluwat ning pamahayag duha ka adlaw sukad napalipdan niya ang iyang WBC title pinaagi sa impresibong unanimous decision nga kadaogan batok sa kanhi way pildeng Meksikanong challenger nga si Luis Castillo sa main event sa "Blow-by-Blow" card ni Manny Pacquiao niadtong Septiembre 22 didto sa Mandaluyong City College Gym. Human naka-iskor og knockdown sa unang hugna, ang garbo sa Manolo Fortich, Bukidnon midominar sa nahibiling bahin sa 12 ka hugna nga away aron ilampaso ang Meksikanong bisita sa iskor nga 120-107, 120-107 ug 118-109.
Si Jerusalem, nga nagtangag og 23-3 rekord uban ang 12KOs, seguradong mopas-an og mabug-at nga tahas kon ugaling madayon ang gihandum niyang engkwentro batok ni Niyomtrong.
Ang 34-anyos nga si Niyomtrong, nga nailhan sa ring name niyang Knockout CP Freshmart, wa pay pilde sa 25 ka away uban ang 9Kos.
"Mao ni ang giplano sa among team. If naay opportunity nga mag-unify sa Thai boxer mas maayo para nindot ang duwa," dason pa sa trainer ni Jerusalem nga si Michael Domingo.