Metro Cars mikastigo sa Slowgrind, 5-0 na sa MPBA

CEBU, Philippines — Gimasaker sa Metro Cars ang Slowgrind, 150-93, aron inaton ang mainit nilang ratsada ngadto sa lima ka duwa sa Mandaue's Pride Basketball Association (MPBA) Commissioner's Cup Season 3 niadtong weekend didto sa Cebu Port Authority (CPA) Gym.   

Lima ka mga batos sa Metro Cars ang mikadlit og kapin sa 20 puntos nga miresulta ngadto sa way kaluoy nilang 57 puntos nga demolisyon sa nagkagidlay nga Slowgrind.  Sila si Sanel Cabalda ug Jeofrey Deligero mipabuto og 29 puntos matag usa gawas nga nagkumboya'g 18 ka rebounds ug lima ka assists samtang si Albert Borling hapit mopupo og triple-double uban ang 24 puntos, walo ka rebounds ug walo sab ka assists.

Naglabaw lamang ang Metro Cars og 17 puntos sa halftime, 64-47, apan gikuso-kuso niini ang  Slowgrind sa second half,  86-46, nga miresulta ngadto sa usa ka dakong demolisyon. Si James Kenneth Asoro mitali og 22 puntos, pito ka rebounds ug upat ka assists samtang si Philip Larayos midugang og 21 puntos, duha ka rebounds, upat ka assists ug duha ka steals alang sa Metro Cars nga mipahugot sa ilang pagkupot sa solong liderato sa Premiere Division bitbit ang perpektong 5-0 record.

Si  Lhee Brandon Tiu mipaulbo og 42 puntos, 10 ka rebounds ug duha ka assists samtang si MacMac Mollona mitimbre og 26 puntos, upat ka rebounds ug upat ka assists apang nakawang ang ilang paningkamot kay ang Slowgrind bokya gihapon human sa duwa ka duwa.

Sa laing sangka sa Premiere Division, si Kibs Genobia miharos og 31 puntos, 12 ka rebounds ug lima ka assists sa dihang gibuntog sa Flago Prayboys ang Home Sourced, 90-87, aron pagsolo niini sa ikatulong dapit bitbit ang 3-2 nga baraha.

Dako sab og naambag si Kenny Genobia sa Prayboys uban ang 18 puntos, pito ka rebounds ug lima ka assists. Si James Villafuerte mikadlit og 31 puntos, walo ka rebounds ug unom ka assists samtang sila si Isabelo Almohallas ug Alberto Talisay nagkumbinar og 33 puntos apan way nahimo kay ang Home Sourced natagak sa 2-3.