Embiid nagpahigot sa Sixers

CEBU, Philippines — Si Joel Embiid mipirma og tulo ka tuig nga contract extension uban sa Philadelphia 76ers.

Kini tungod kay buot sa eksplosibong sentro nga magpabilin sa Sixers sa tibuok niyang karera sa NBA.

Sa kantidad nga $193 million, si Embiid magpabilin sa poder sa Sixers hangtud sa 2028-29 season.

Ang 2023 NBA MVP ug seven-time All-Star mitabang sa Team USA paglangkat og gold medal sa Paris Olympics sa miaging bulan.

Ang two-time scoring champion nga motikang sa ikasiyam niyang tuig sa liga sunod bulan nagkanayon nga gusto niyang tunolan ang Sixers sa labing una nilang korona sa NBA sukad niadtong 1983.

Si Embiid mi-average og career-high nga 34.7 puntos, 11.0 rebounds, 5.6 assists, 1.2 steals ug 1.7 blocks sa miaging season.

Sa kikatibuk-an, ang 3rd overall pick niadtong 2014 NBA Draft mipatak og 27.9 puntos, 11.2 rebounds, 3.6 assists ug 1.7 blocks sud sa 433 ka duwa uban sa Sixers.