CEBU, Philippines — Sugdan sa two-time defending champion University of the Visayas (UV) Green Lancers ang ilang kampanya nga maka-Grand Slam batok sa University of San Jose-Recoletos (USJ-R) Jaguars sa Cebu Schools Athletic Foundation, Inc. (CESAFI) Season 24 men's basketball tournament karong adlawa, Septiembre 22, diha sa Cebu Coliseum.
Gipangulohan nilang team captain Jimpaul Amistoso ug reigning MVP Kent Ivo Salarda, ang Lancers makigpinaksitay sa Jaguars sa main game sa alas-5 sa hapon.
Ang Lancers naglaraw nga mokulit og laing three-peat, nga katapusan nilang nakab-ot gikan niadtong 2016 ngadto sa 2018.
Kabahin kini sa lima ka korona sa kampiyonato nga nadaog sa Lancers sud sa pito ka sagunson nilang pagtaak sa Finals ubos sa paggiya ni coach Gary Cortes sukad niadtong 2015. Samtang ang Jaguars moparada og bag-ong coach nga si Julius Cadavis, kanhi champion player uban sa Sacred Heart School-Ateneo de Cebu Magis Eagles nga nakapakita sab og aksiyon uban sa Arellano Chiefs sa NCAA ug sa University of San Carlos Warriors sa CESAFI atol sa iyang panahon sa kolehiyo.
Sa laing bahin, ang Benedicto College Baby Cheetahs mo-debut sa CESAFI batok sa University of Cebu Lapu-Lapu and Mandaue (UCLM) sa usa sa tulo ka mga duwa sa high school sa dili pa magbangga ang Lancers ug Jaguars.
Ang Baby Cheetahs ug UCLM magsangka sa alas 3:30 sa hapon.
Sa pasiunang duwa sa alas 12:30 sa hapon, ang UC Baby Webmasters, nga karon ubos na sa pagtimon ni coach Reggie Licanda, mosakbang sa Don Bosco Technical College (DBTC) Greywolves, samtang ang USC Baby Warriors makigbugno sa USJ-R Baby Jaguars sa ikaduhang duwa sa alas-2 sa hapon.