CEBU, Philippines — Ang Cebu Schools Athletic Foundation, Inc. (CESAFI) duna nay college women's basketball sunod tuig.
Mao kini ang gipahibawo ni CESAFI commissioner Felix "Boy" Tiukinhoy, Jr. atol sa pormal nga paglusad sa CESAFI Season 24 kagahapong adlawa didto sa Cube Wing sa SM City Seaside.
"The CESAFI will have college women's basketball for next year," matud pa ni Tiukinhoy. "This is now our additional event for 2025 for all schools. Those who want to participate, we would be glad to have these women's college teams."
"I think this is good for us because the league will be celebrating its 25th anniversary," dugang pa ni Tiukinhoy.
Sa laing kalamboan, ang basketball tournament sa liga maglangkob na og upat ka dibisyon sa giatngan niining Season 24 nga magsugod uban ang bonggang seremonyas karong Sabado, Septiyembre 21, diha sa Cebu Coliseum.
Ang labing bag-ong gidugang mao ang 15 Under age group.
Ang ubang kategoriya nga kumbatihan mao ang 12 Under (elementary), 18 Under (high school), ug 25 Under (college).
Ang University of the Visayas (UV) Green Lancers ug Sacred Heart School-Ateneo de Cebu (SHS-AdC) Magis Eagles parehong naglaraw nga mokab-ot og laing "three-peat" apan angayan silang mangandam sa malisud nga hagit gikan sa lig-on sab nilang mga karibal.
Sa buena manong mga duwa human sa engrandeng pagbukas, ang mga teams gikan sa Cebu Roosevelt Memorial Colleges (CRMC) mowadwad dayon sa ilang abilidad.
Ang CRMC Baby Mustangs makigharong sa Cebu Eastern College (CEC) Dragons, samtang ang mga maguwang nila sa college makigbugno sa Benedicto College Cheetahs.