CEBU, Philippines — Ang Avantrac nag-agi og makuyaw nga dalan sa wala pa pioga ang CBM Engineering, 67-63, aron langkaton ang korona sa kampiyonato sa 7th Corporate Cup sa Architects+Engineers Basketball ning bag-ohay pa lamang didto sa University of San Carlos (USC)-North Campus gymnasium.
Si Noriko Benedicto milansang og lima ka 3-pointers sa iyang 21 puntos nga iyang gipalamanan og duha ka rebounds ug usa ka assist alang sa Avantrac hinungdan nga siya maoy gibayaw nga Finals MVP.
Mihimo sab og kasikas si Joshua Gayotin sa Avantrac uban ang 14 puntos, lima ka rebounds, usa ka steal, ug usa ka block.
Si Jett Latonio mipupo og 23 puntos, unom ka rebounds, tulo ka assists, ug tulo ka steals apan nakawang ang iyang paningkamot sa habig sa CBM.
Sa sangka alang sa ikatulong dapit, si Jan Manalili mipabuto og 26 puntos aron pangulohan ang Phelps Dodge ngadto sa 96-54 nga demolisyon sa Buildrite.