Mosuway paglangkat sa korona sa CESAFI sa ikatulong higayon
CEBU, Philippines — Buligan na ba kaha sa maayong palad ang University of Cebu (UC) Webmasters sa ikatulong higayon?
Unsa man gani ang ugma nga nagpaabot kanila, usa ka butang ang segurado.
Buhaton sa Webmasters ang tanan kutob sa ilang mahimo sa dihang mosuway na sab sila paglangkat sa korona sa basketball sa Cebu Schools Athletic Foundation, Inc. (CESAFI) Season 24 nga gikatakdang mosikad karong Sabado, Septiyembre 12, diha sa Cebu Coliseum.
Ubos sa pagtimon ni coach Kenneth Kernn Sesante, ang Webmasters miabante sa Finals sa miaging duha ka seasons sa primerong inter-school nga liga sa Sugbo.
Apan miyukbo sila sa gamhanang University of the Visayas (UV) Green Lancers sa maong mga higayon.
Ning higayona, dili na sad sayon nga dalan ang agian sa Webmasters gumikan kay wala na ang pipila nila ka mga key players nga sila si Season 23 Mythical Five member John Regie Dajab, Joseph Arth Nalos, Maverick Eligoyo, ug John Herben Linares tungod kay nakahiagum og mga angol.
Duna pa hinooy mga lig-ong pambato ang Webmasters gikan sa ilang lineup sa miaging tuig nga naglangkob nilang team captain John Carl Angelio, reigning CESAFI 3-point King Jasper Pacaña, Ricofer Sordilla, Danie Boy Lapiz, Ray Charles Libatog, Luther Gabriel Leonard, Zareygel Rosano, Jhiey Paraldo, Michael Diaz, ug Mark Jhon Ecal.
"While we missed key players due to injuries, we are still grateful that we were able to keep intact the majority of the players from last season. Thus, we are ready to compete again," matud pa ni Sesante.
Gawas sa karaan nilang mga sinaligan, si Sesante nanghinaut nga makakuha og dugang kusog gikan sa bag-o nilang mga batos nga sila si McSteven Ursal, usa ka transferee gikan sa University of Southern Philippines Foundation (USPF) Panthers, Kendall Limana, nga kanhi miduwa uban sa Southwestern University (SWU)-Phinma Baby Cobras, Fil-Am Jepherson Nonol gikan Houston, Texas, ug sila si Arnold Miñoza ug Johncel Borjal gikan sa mga high school teams sa UC.
"We are excited to give it another shot this year," padayon pa ni Sesante."We can assure that the team will go all out as always. It will be a more exciting team this season as the holdovers have significantly matured and we have new players that can make instant impact in the game."
Sa ilang laraw nga sakmiton ang daw idlas kaayong titulo sa kampiyonato, si Sesante nasayud nga taas ug mapit-os nga biyahe ang sagubangon sa Webmasters apan andam silang atubangon ang tanang mga hagit nga nag-atang kanila sa unahon.
"Just like most of the teams, the goal is to bring home the bacon. But I know that it will be more challenging this year as the new teams like UP-Cebu, Benedicto College and CRMC have beefed up their rosters and UV is still intact," padayag pa ni Sesante. "We will just take it one game at a time and let’s see where it will lead up to."