CEBU, Philippines — Padayong miratsada ang Metro Cars ug ang labing uwahi nilang gibiktima mao ang Flago Prayboys nga ilang gilat-an og 22 puntos, 96-74, sa Mandaue’s Pride Basketball Association (MPBA) Commissioner’s Cup Season 3 niadtong weekend didto sa Cebu Port Authority (CPA) gym.
Si Jeofrey Deligerio mitali og 12 puntos, samtang si Dwight Godinez midugang og 11 puntos, tulo ka rebounds, lima ka assists ug usa ka steals alang sa Metro Cars, nga mipahugot sa ilang pagkupot sa solong liderato sa Premier Division uban ang perpektong 4-0 rekord.
Lain pang tulo ka players ang mikadlit og double figures alang sa Metro Cars. Sila si Philip Larayos ug Sanel Cabalda mi-iskor og 11 puntos matag usa samtang si Hersley Fuentes mihipos og 10 puntos.
Si Kenny Genobia miposte og 15 puntos apan way nahimo gumikan kay ang Prayboys natagak sa 2-2.
Sa laing bahin, si James Balili mikolekta og 19 puntos, lima ka rebounds, unom ka assists ug unom ka assists sa dihang gipayaka sa Void ang Welec, 81-74, aron inaton ang ilang marka ngadto sa 3-1.
Si Mark Monte mipabuto og 24 puntos apan nakawang ang iyang paningkamot kay ang Welec nakatilaw sa ikaduha nilang pilde sa tulo ka duwa.
Sa Elite Division, si Oliver de la Cruz mipupo og 22 puntos, duha ka rebounds, usa ka assist ug lima ka steals sa dihang ang Steadfast Builders mitabla sa ilang baraha ngadto sa 2-2 human gibugha ang Purexfit Cebu, 82-70.
Si Acer Go miharos og 20 puntos apan wala makapugong sa Purexfit Cebu nga masugamak ngadto sa ikatulo nilang sagunson nilang kaparotan.