CEBU, Philippines — Ang Hammerhead-UCMed milusad og eksplosibong ataki sa naghinapos nga bahin sa duwa aron patikangkangon ang Cebu Doctors' University Hospital, 65-42, sa dumot nilang finals rematch ug langkaton ang korona sa Athletic Cebu League (ACL) Season 2 didto sa Sacred Heart Center Sports Club sa may dalan D. Jakosalem, dakbayan sa Sugbo.
Si Aljon Armian maoy nangu sa Hammerhead ngadto sa kampiyonato uban ang 15 puntos, duha ka rebounds, usa ka assist ug tulo ka steals hinungdan nga siya maoy gibayaw nga Finals MVP.
Sila si Jade Isenth Iñigo, Ralph Dy, Jhoei Christian Pilapil, ug Rhiel Samson nagkumboya'g 29 puntos alang sa Hammerhead, nga naglabaw lamang og usa ka lugas, 29-28, human sa tulo ka kuwarter.
Apan ang Hammerhead mitagak og makalisang nga 36-14 nga bomba sa pinal nga bahin sa duwa aron palukapahon ang CebuDoc.
Ang ubang mga sakop sa Hammerhead-UCMed mao sila si Jestoni Abia, Wesler Lim, Jorge Norberto Miguel Tan, Kirk Chloe Neal Parame, John Michael Pala, John Rio Tomias, Aldwin Cañido, Deo Dominique Duja, Joven Namocatcat, Alex william Bascug, Keith aldrin Ompad, Sherwin Miñoza, Khyle Marwin Villarico, Japeth Salera, ug Enrico Larrazabal.
Ang ACL Season 2 giorganisa nilang Dr. Dilbert Monicit ug Kith Diaz Ng uban nilang Reg Rodulfo ug Mardion Delima isip mga commissioners.