UV Lancers nagmangtas dayon sa Alegado Cup

CEBU, Philippines — Ang two-time Cebu Schools Athletic Foundation, Inc. (CESAFI) defending champion University of the Visayas (UV) Green Lancers misikad sa ilang kampanya pinaagi sa 90-69 nga paglampornas sa Cebu Roosevelt Memorial Colleges (CRMC) Mustangs sa labing unang Mayor Teresa Alegado Invitational Cup Inter-Collegiate Basketball Tournament niadtong Dominggo sa gabii, Septiembre 8, didto sa Consolacion covered court.

Si Ivan Clark Alsola mikadlit og 15 puntos samtang ang kasamtangang CESAFI MVP nga si Kent Ivo Salarda ug si Albert John "AJ" Sacayan nagkumboya'g 22 puntos alang sa Lancers, nga milusad og mura'g bagyo nga opensiba sa katapusang hunat sa duwa aron patikalbongon ang Mustangs.

Ang Lancers abante lamang og singko puntos, 56-61, human sa tulo ka kuwarter, apan ang mga batos ni coach Gary Cortes mipasiugda og nagkayong 29-13 rally sa naghinapos nga bahin sa duwa aron ilubong ang Mustangs og 21 puntos.

Si Keaton Taburnal mitali og 24 puntos samtang sila si Jack Roa ug Earl Laniton mikolekta og 11 puntos matag usa apan wala silay nahimo tungod kay ang Mustangs nahisukamod sa ikaduhang sunod-sunod nga higayon.

Sa laing duwa, ang University of San Carlos (USC) Warriors dali nga nakabawi sa miagi nilang kapildihan human gipukan ang Benedicto College Cheetahs, 86-82. Alkansi og double-digit sa sayong bahin, 12-22, ang Warriors kanunay nga naggukod apan nagsandig sa makusog nilang suntok sa endgame aron tumbahon ang Cheetahs.

Sila si James Gica ug Kyle Maglinte nagkumboya'g 35 puntos samtang si Ren Enriquez mitampo og 15 puntos alang sa Warriors.

Si Den Rick Orgong maoy nangu sa Cheetahs uban ang 24 puntos samtang si AJ Tolipas mihipos og 11 puntos sa pilderong kawsa.