Artera mikastigo sa Matia's sa MPBA Season 3

CEBU, Philippines — Sila si Zaionyl Rosano ug Mark Leonard Solonia nagkumboya'g 47 puntos aron pangulohan ang Artera Builders ngadto sa 93-74 nga demolisyon sa Matia’s Foodhaus ubos sa Elite Division sa Mandaue’s Pride Basketball Association (MPBA) Commissioner’s Cup Season 3 niadtong weekend diha sa Cebu Port Authority (CPA) Gym.

Si Rosano mipabuto og 25 puntos samtang si Solonia midugang og 22 puntos sa dihang ang Artera miangkon sa ikaduhang puwesto sa ilang grupo bitbit ang 2-1 nga baraha.

Sila si Joseph Cabahug ug Justine Dacalos mihimo sab og kasikas sa Artera uban ang 10 puntos matag usa.

Si Dyle Dajalos mipaulbo og 26 puntos samtang si Fritz Dajalos mitali og 18 puntos apan nakawang ang ilang paningkamot gumikan kay ang Matia’s nakatilaw sa ikaduha nilang pilde sud sa tulo ka duwa.

Sa Premier Division, ang HomeSourced ug Welec parehong mitabla sa ilang rekords ngadto sa 2-2.

Si Alberto Talisay mihipos og 14 puntos samtang sila si Isabello Almohallas ug Bolyn Hilario nagkumbinar og 21 puntos sa dihang gibuntog sa HomeSourced ang Urestore, 68-63. Sila si Steven Cabanday ug Sherwin Resilla mi-iskor og 12 puntos matag usa samtang si Arjay Jumao-as miposte og 10 puntos alang sa Urestore, nga natagak sa 1-3.

Sa laing bahin, si Carlo Bacalos mipupo og 20 puntos ug 13 ka rebounds sa dihang gilampornas sa Welec ang Slowgrind, 104-81.

Sila si RC Espinosa ug Francis Monteron mihipos og 18 puntos matag usa samtang sila si Mark Monte ug AJ Gabato nakatigum og 24 puntos alang sa balanseng ataki sa Welec.

Si Gerard Matthew Colina mibubo og 24 puntos samtang sila si MacMac Molina, Jaykel Atillo ug Lee Brandon Tiu nagkubinar og 38 puntos apan nangahoyhoy ang ilang abaga tungod kay ang Slowgrind nagpabiling bokya human sa tulo ka duwa.