Nest Workspaces Batch 2013 kampiyon gihapon sa SHAABAA

CEBU, Philippines — Ang Nest Workspaces Batch 2013 mipiog sa Xchange Forex Batch 2018, 74-68, sa tinagakay nga duwa sa ilang best-of-three finals aron pagpabiling kampiyon sa Division C sa Sacred Heart Ateneo Alumni Basketball Athletic Association (SHAABAA) Season 27 niadtong Domingo, Septiyembre 1, didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Sila si Fletcher Galvez ug Emman Malazarte ang mga bida sa dihang ang Batch 2013 madagison nga mibangon human madagma sa pasiuanang duwa sa serye dayon na ngadto sa malampusong pagdepensa sa ilang trono.

Si Galvez miposte og double-double uban ang 23 puntos ug 14 ka rebounds nga iyang gipalamanan og tulo ka assists, usa ka steal ug usa ka block hinungdan nga siya maoy gibayaw nga Finals MVP.

Impresibo sab si Malazarte nga mikadlit og 23 puntos, walo ka rebounds, duha ka assists ug duha ka steals.

Dako sab og natampo ang season MVP nga si Rendell Senining nga mihipos og 12 puntos ug mipasa og 11 ka assists ingon man si si Arc Araw-araw miamot og 11 puntos, pito ka rebounds, ug tulo ka assists alang sa Batch 2013.

Sila si Senining ug Araw-araw naglangkob sab sa Mythical Five kauban silang Mitch Almodal sa Batch 2020, Benedict Andre Chua sa Batch 2018, ug Josemaria Rafael Navarro sa Batch 2014.

Sa knockout Game 3, sayong nanginit ang Batch 2013 nga milusad og 9-0 run aron pagrehistro og 20-6 nga bentaha human sa nag-unang 10 minutos sa aksiyon.

Apan ang Batch 2018 miresbak pinaagi sa pagtagak og 13-0 nga bomba aron tablahon ang iskor, 47-47, sa wala pa iloga ang labaw, 52-49, pipila pa lamang ka segundos ang nakaon sa katapusang kuwarter.

Wala sab hinoon magpa-alkansi ang Batch 2013 nga mipakita og igong katakos sa krusyal nga bahin sa kulbahinam nga sangka aron pag-ipsot ngadto sa sayes puntos nga kadaogan.   

Ubos sa paggiya ni coach Paul Joven uban ni shipping magnate ug social media personality Chase Cokaliong isip team owner/manager, ang ubang mga sakop sa back-to-back SHAABAA champions Batch 2013 mao sila si JJ Ong, Gerard Beniga, Rolan Go Bui, Nikki Pimentel, Al John Lim, Jacob Lee, Alphonsus Doyon, Miguel Competente, Manu Fernando, Kent Megio, ug Chino Chua.   

Sa laing bahin, si Andrew Velasco maoy nangu sa Batch 2018 bitbit ang 14 puntos samtang sila si Benedict Andre Chua, Eroll Pastor, ug Jed Colonia mi-iskor og 13 puntos matag usa. Napakyas man tuod ang koponan nga gipaluyohan sa Xchange Forex apan mapasigarbuhon gihapon sila tungod sa paghatag nila og maayong away sa usa sa labing nindot nga kumbati sa finals sa kasaysayan sa SHAABAA.