CEBU, Philippines — Sa labing unang higayon, ang lungsod sa Consolacion mopahigayon og inter-collegiate basketball tournament nga salmotan og unom ka teams gikan sa Cebu Schools Athletic Foundation, Inc. (CESAFI) karong Septiembre 7-12 didto sa Consolacion covered court.
Gipangulohan sa two-time CESAFI defending champion University of the Visayas (UV) Green Lancers, ang ubang mga entrante mao ang University of San Carlos (USC) Warriors, University of Southern Philippines Foundation (USPF) Panthers, University of the Philippines (UP) Cebu Fighting Maroons, Benedicto College Cheetahs, ug Cebu Roosevelt Memorial Colleges (CRMC) Mustangs.
Bahinon sa duha ka grupo, moduwa sila og single round robin sa eliminasyon.
Ang top 2 qualifiers moabante sa crossover semifinals, diin ang mga mananaog maoy mag-ilog sa korona sa tinagakay nga duwa.
Ang makampiyon mobulsa og P100,000, samtang ang first runner-up makadawat og P50,000.
Ang unom ka adlaw nga torneyo gituyo aron pagdugang og lamas sa tinuig nga selebrasyon sa pista sa Consolacion agi'g pangilin sa minahal nilang patron nga si San Narciso sa Oktubre 29.
Hugtanon kining gipaluyohan ni mayor Teresa "Nene" Alegado, vice mayor Rey Damole, konsehal Alforque Ouano, Marilou Casul, Lalinka Yu, Fred Herrera, Leo Napuli, Ben Ermac, Brandon Cuizon, ug Salome Palang, ABC President Wesley Alomiren, ug SK Federation chairperson Shella Arela Carpina.
Ang tanang mga duwa ubos sa superbisyon ni sports commissioner Paul Alelu Flores ug sa iyang deputy commissioners nga sila si Lee Mhar Dahil ug Agvin Jugan inabagan ni technical committee chief Stephen Ababon.