Xchange Forex 2018, Puresteel 2011 naka-una sa SHAABAA division finals
CEBU, Philippines — Ang Xchange Forex Batch 2018 ug Puresteel Manufaturing Corp. Batch 2011 miposte og 1-0 nga bentaha sa best-of-three division finals sa Sacred Heart Ateneo Alumni Basketball Athletic Association (SHAABAA) Season 27 dkidto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.
Si Lyder Kent Canieso mikadlit og 14 puntos, si Benedict Andre Chua mirehistro og double-double, samtang si Jed Colonia milansang sa game-winner sa dihang ang Batch 2018 madasigong mibangon human malubong og 12 putnos sa sayong bahin sa ikaduhang kuwarter dayon na ngadto sa pagpakurat sa defending champion Nest Workspaces Batch 2013, 61-59, sa Division C.
Si Chua mitagak og 10 puntos ug 14 ka rebounds, si Errol Pastor duna say 10 puntos ug tulo ka rebounds, samtang si Colonia mitapos uban ang nuybe puntos, 14 ka rebounds, lima ka assists ug duha ka steals alang sa Batch 2018 nga nanginahanglan og usa na lang ka daog aron sakmiton ang korona sa Division C.
Nagmangtas si Fletcher Galvez uban ang 29 puntos ug 14 ka rebounds alang sa Batch 2013, apan nakakuha lamang siya og suporta gikan ni Rendell Senining nga mihipos og 17 puntos, walo ka rebounds, tulo ka assists ug tulo ka steals sa pilderong kawsa.
Sa laing bahin, sila si Bernard Chioson ug Kiefer Lim nagkumboya'g 28 puntos, 17 ka rebounds, 12 ka assists ug lima ka steals sa dihang ang Batch 2011 midominar sa ZLREJ Trading and Construction Batch 2010, 59-52, aron pagpanoktok sa titulo sa Division B.
Ang Batch 2011 diriyot mikolapso human miposte og dakong 50-34 nga labaw padung sa katapusang kuwarter apan dali nga namawi aron paglakaw ngadto sa siyete puntos nga kadaogan.
Si Bradley Bacaltos nagparamdam sab sa Batch 2011 bitbit ang 12 puntos, walo ka rebounds, lima ka assists, duha ka steals, ug duha ka blocks.
Si Gabe Branzuela mipabuto og 23 puntos, 13 ka rebounds, tulo ka assists ug pito ka steals apan nakawang ang iyang paningkamot sa habig sa Batch 2010.
- Latest
