SHAABAA Division A finals: Core Pacific nakaangkon pa og laing kinabuhi

CEBU, Philippines — Ang Core Pacific Group miresbak sa GMall of Cebu pinaagi sa kulbahinam nga desisyon, 54-53, aron pagpuwersa og tinagakay nga Game 3 sa Division A finals sa Sacred Heart Ateneo Alumni Basketball Athletic Association (SHAABAA) Season 27 niadtong weekend didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, daklbayan sa Mandaue.

Nahanaw ang 12 puntos nga bentaha sa Core Pacific, 33-21, sa naghinapos nga bahin sa first half gumikan kay ang GMall milusad og madagison nga rally aron ilogon ang labaw, 43-42, sa sayong bahin sa katapusang kuwarter.

Dali hinoon nga miabante og balik ang Core Pacific, 48-44, sa pinal nga singko minutos sa aksiyon.

Misunod niini ang sikit kaayong kumbati apan ang Core Pacific mipakita og igong katakos taliwaka sa presyur dayon na ngadto sa pag-angkon og laing kinabuhi. Si Jeremy Ryan Huang maoy nangu sa Core Pacific uban ang 10 puntos, lima ka rebounds, usa ka assist ug tulo ka steals apan sila si Joel Co, Dave Michael Ting, Joseph Lo, ug Dave Lim dako sab og naambag.

Si Co mihipos og nuybe puntos, walo ka rebounds, tulo ka assists, ug duha ka steals, si Ting mitali og otso punos, duha ka rebounds ug tulo ka assists, si Lo miamot og siyete puntos ug pito sab ka rebounds, samtang si Lim mi-iskor og sayes puntos nga iyang gipalamanan og 11 ka rebounds, duha ka assists, ug usa ka block.

Sa laing bahin, sa sangka alang sa ikatulong puwesto, ang '04 For the Win Batch 2004 milampaso sa Radius One Batch 2007, 72-48, sa Division B, samtang ang Cebu Landmasters/CloudKart Batch 2014 mipayaka sa FADI Batch 2021, 60-42, sa Division C.

Sila si Christopher Consunji ug Ervin Lopena nagkumbinar og 24 puntos, 16 ka rebounds, 10 ka assists ug tulo ka steals alang sa Batch 2004, samtang si Francis Dave Soria midugang og 11 puntos ug upat ka rebounds.

Si Lucky Ecarma mikadlit og 19 puntos, 14 ka rebounds, ug lima ka assists alang sa Batch 2014. Nakakuha siya og dakong suporta gikan ni Jair Igna nga mipupo sab og 19 puntos uban ang unom ka rebounds.