Celebrity basketball team ni Gerald Anderson mopakita'g aksiyon sa Alcantara
CEBU, Philippines — Ang Th3rd Floor celebrity basketball team nga gipangulohan ni Gerald Anderson mowadwad sa ilang abilidad sa usa ka exhibition game nga gikatakda karong Agosto 19 didto sa Alcantara Civic Center sa lungsod sa Alcantara habagatang bahin sa Sugbo.
Ang libre sa publiko nga pasundayag magsugod sa alas-7 sa gabii.
Si Anderson, usa ka notadong aktor nga mihimo sab og marka isip propesyonal nga basketbolista, moduwa kauban silang Jeremiah Lisbo, Argel Saycon, Jairus Aquino, Lance Carr, Elyson de Dios, Ashton Salvador, Tristan Ramirez, Johannes Rissler, ug LA Nepomuceno.
Ilang banggaon ang Alcantara LGU selection.
Ang maong kalihukan gipahigayon aron pagdugang og lamas sa Mayor Fritz Lastimoso Cup 2024 Basketball Tournament, nga usa sa mga sentrong atraksiyon sa selebrasyon sa tinuig nga pista sa lungsod agi'g pangilin sa minahal nilang patron nga si San Agustin sa Hippo karong Agosto 28.
- Latest
