CEBU, Philippines — Si Manny Pacquiao naabot na sa Japan niadtong Martes sa gabii alang sa giatngan niyang exhibition fight batok ni Japanese kickboxer Rukiya Anpo karong Dominggo didto sa Saitama Super Arena.
Ang sangka ni Pacquiao batok ni Anpo, nga kanhi K-1 super lightweight champion, gikatakda sud sa tulo ka hugna ubos sa mga lagda sa boksing.
Bisan og usa lamang kini ka pasundayag nga maghatud kaniya og milyones nga kita, ang bugtong eight-division world champion sa kasaysayan magsagubang og malisud nga tahas ni Anpo, nga mas bata sa edad nga 26 anyos ug mas taas sa gitas-on nga unom ka tiil.
Mao kini ang unang aksiyon ni Pacquiao sukad niadtong 2022 sa dihang nakig-engkwentro siya ni Korean martial artist ug video blogger DK Yoo sa usa gihapon ka exhibition match didto sa Seoul.
Alang ni Pacquiao, mahinungdanon ang bugno nilang Anpo gumikan kay mao kini ang mosukod kon unsa siya kaandam sa plano niya nga mobalik sa pro boxing.
Sigun sa nahaunang mga taho, si Pacquiao buot nga mohagit ni World Boxing Council welterweight champion Mario Barrios karong Oktubre o Nobiembre.
Si Pacquiao katapusang mi-away isip propesyonal niadtong 2021 diin siya gipilde ni Yordenis Ugas sa Cuba didto sa Las Vegas.