Jokic mosagubang og malisud nga misyon
![Jokic mosagubang og malisud nga misyon](https://media.philstar.com/photos/2024/07/23/jokik_2024-07-23_00-17-55.jpg)
CEBU, Philippines — Human makadaog og tulo ka MVP titles ug usa ka kampiyonato sa NBA, si Nikola Jokic mopas-an og usa pa ka mabug-at nga misyon sa iyang karera.
Kini way lain kondili ang paglangkat og Olympic gold medal alang sa yuta niyang natawhan nga Serbia. Mao kini ang gihandum sa mga kababayan sa Denver Nuggets superstar sa gikahinaman nga Paris Olympics 2024 nga sugdan na karong Hulyo 21.
Ang 29-anyos nga si Jokic mobalik sa internasyonal nga kompetisyon usa ka tuig sukad siya mipalta sa Basketball World Cup dinhi sa Pilipinas diin ang Serbia naka-silver lamang human gipilde sa Germany, 83-77, sa kulbahinam nga final. Nahitabo kini human si Jokic gipauwanan og pagdayeg sa mga Serbians nunoy sa pagpangu niya sa Nuggets ngadto sa makasaysayanon niining korona sa NBA.
Sa pag-isnab niya sa ilang national team, miulbo ang kaspa sa mga Serbians nga mipahungaw sa ilang kapungot sa social media diin ilang gibansagan si Jokic nga usa ka tradyor. Way duda nga mao kini ang nakapaaghat ni Jokic nga modala og balik sa ilang bandila uban ang panghinaut nga makabawi siya sa iyang nasud.
"Jokic's participation certainly matters, in every sense. Both from the perspective of individual quality and from the perspective of his personality," matud pa ni Serbia coach Svetislav Pesic.
Niadtong Mayo, si Jokic mibira sa ikatulo niyang tropeyo isip MVP sa NBA. Uban ang average nga 26.4 puntos, 12.4 rebounds, ug 9.0 assists, iyang gipilde sila si Shai Gilgeous-Alexander sa Oklahoma City Thunder ug Luka Doncic sa Dallas Mavericks sa pinal nga botasyon alang sa maong prestihoyosong pasidungog. Halos kumpleto na ang tanan sa karera ni Jokic. Bulawang medalya na lang sa Olympics ang kuwang.
Mao kini ang buot niyang kab-oton didto sa nabantog nga siyudad sa France. (BANAT NEWS)
- Latest