UV Lancers nakapupo og leksiyon sa bayugan

CEBU, Philippines — Napakyas man tuod ang University of the Visayas (UV) Green Lancers sa ilang tinguha nga sakmiton ang titulo apan daw sa daogan lang sila gihapon tungod kay napupo og bililhong kasinatian sa ilang pagsalmot sa Mayor Kirk Asis Open Invitational Basketball Tournament 2024 didto sa Lope Asis Memorial Gymnasium sa Bayugan City, Agusan del Sur.

Gipaluyohan sa Bustamante Construction, ang Lancers misikad sa ilang kampanya pinaagi sa impresibong 80-68 nga kadaogan batok sa Vincare Pharma-University Perpetual Help Altas, apan nabaraw ang ilang laraw nga mo-abante sa kampiyonato human nakatilaw og tulo ka sagunson nga pilde sa mga kamot sa Ariano’s Construction-Emilio Aguinaldo College (EAC) Generals, ARQ Builders-Adamson University Soaring Falcons, ug  Wengburs Apartelle and Ella Store-San Beda University Red Lions.

Sa ilang rematch, ang Lancers miyukbo na sab sa Generals, 69-80, aron pagpahiluna lamang sa ikaupat nga puwesto.

Bisan pa man niini, nakab-ot gihapon sa Green Lancers ang ilang misyon gumikan kay nasukod man nila ang kapasidad sa ilang koponan batok sa lig-ong mga koponan gikan sa kaulohan.

“Dako gyud kaayo og tabang ang pag-apil namo ani nga tournament dire sa Bayugan kay nakita namo ang whole view sa team,” matud pa ni Cortes, nga migiya sa Lancers ngadto sa lima ka korona sud sa pito ka sunod-sunod nilang pagtaak sa finals sa Cebu Schools Athletic Foundation, Inc (CESAFI) sukad siya nahimong coach sa UV niadtong 2015.

 “Amo nasukod asa mi nga level sa basketball ilabi na sa panahon nga mapilde mi kay dinhi namo mahibal-an ang among weaknesses nga angay i-improve,” dugang pa ni Cortes.

Ang pag-apil sa Lancers sa tulo ka adlaw nga torneyo kabahin sa hugtanon nilang preparasyon alang sa umaabot nga CESAFI Season 24 diin sila nagtirada og laing three-peat nga katapusan nilang natagamtaman gikan niadtong 2016 ngadto sa 2018.