"Bakbakan sa Masbate 2": Santisima nagpanikad mokumbati atubangan sa iyang mga katagilungsod
CEBU, Philippines — Si kanhi World Boxing Organization (WBO) Oriental super bantamweight champion Jeo "Santino" Santisima misaad nga mohimo og impresyon sa dihang mopakita siya og aksiyon sa labing unang higayon atubangan sa mga katalilungsod niyang Masbateños.
Kay mao kini ang anaa sa iyang huna-huna, usa ka eksplosibong salida ang gipaabot gikan ni Santisima (23-7, 19KOs) sa dihang iyang hagiton si Thai champion Arnon Yupang (14-4, 5KOs) alang sa World Boxing Council (WBC) Asia Continental super featherweight title sa main event sa labing unang internasyonal nga pasundayag sa ATK Promotions ni Gobernador Antonio Kho nga giulohan og "Bakbakan sa Masbate 2" karong Hunyo 22 didto sa Masbate Lagoon sa Matayum, Cataingan.
"Excited kaayo ko ug 100% ready na to fight sa ako hometown," matud pa ni Santisima, nga lumad gikan sa lungsod sa Aroroy.
"Buhaton nako ang tanan para mapakita sa tanang Masbateño ang usa ka maayo nga away ug tinuoray nga binukbokay. Abangan ug saksihan gyud ni nila," dugang pa sa kanhi pambato sa nanirado nang ALA Gym.
Ang 27-anyos nga si Santisima nagdumili hinoon paghatag og prediksiyon.
"Ang knockout maabot ra gyud na. Maningkamot lang ko og maayo ug buhaton tanan kutob sa akong mahimo aron modaog," pasalig pa ni Santisima.
Gawas ni Jeo, ang manghud niyang si Alex Santisima, Jr. (8-1, 2KOs) mokumbati sab sa batok ni Jastine "Philippine Tiger" Darap (11-5, 7KOs) alang sa korona sa World Boxing Foundation (WBF) Australsian super flyweight division.
Sa laing 12 ka hugna nga sangka, si Jon Jon "Wolverine" Estrada (18-12-1, 14KOs) sa Elorde Fight Team sa Sucat, Parañaque City makigsinukmagay ni WBC Asian Silver flyweight champion Michael "Hot N' Spicy" Dasmarinas (34-3-2, 24KOs) sa CamSur Sports Academy alang sa bakanting Philippine featherweight title.
Si Esneth "Hard Hitter" Domingo (19-2, 11KOs) sa ZIP Samman Boxing mosakbang ni Nutlai Lalbiakkima (6-1, 5KOs) sa India alang sa trono sa WBC Asia flyweight class, samtang si Ben "Sniper Ben Fairtex" Ligas (16-4, 10KOs) sa Elorde Stable makigbugno ni Alvin Camique (8-2, 3KOs) sa Amoy Gym sa GenSan alang sa kampiyonato sa WBF International super flyweight category. (BANAT NEWS)
- Latest
