CEBU, Philippines — Lab-as pang mihaw-as gikan sa dominanteng kadaogan, ang Boston Celtics naglaraw nga usban ang karibal nilang Dallas Mavericks sa dihang mag-abot na sab sila sa Game 2 sa best-of-seven NBA Finals karong adlawa (Hunyo 10, oras dinhi sa Pilipinas) didto sa TD Garden sa Boston, Massachusetts.
Sugdan ang ilang engkwentro sa alas-8 sa buntag.
Ang Celtics maoy mipadanak sa unang dugo human ilang gikastigo ang Mavs, 107-89, sa buena manong duwa sa serye niadtong Biyernes.
Sila si Jaylen Brown, Jayson Tatum, ug Kristaps Porzingis maoy nangu sa Celtics sa 18 puntos nilang demolisyon sa Mavs.
Ang kahadlokang trianggulo sa Celtics gipaabot nga mao gihapon ang maghatag og dakong labad sa ulo sa Mavs.
Gawas niini, ang Celtics nasayud nga ang Mavs sa kanunay mopakita og maayong duwa gikan sa pagkapilde mao nang ilang gipangandam ang pagresbak sa ilang mga bisita.
"We've got to be ready because they are really good after a loss," matud pa ni Brown.
Sa iyang bahin, si Dallas coach Jason Kidd nagkanayon nga wala silay angay nga kabalak-an ning puntoha.
Nahagba man tuod sa unang duwa apan taas ang iyang kompiyansa nga ang Mavs makabawos dayon batok sa Celtics.
"I think there's no panic with this group," padayag pa ni Kidd. "We didn't play well in game one ... but it's a series and we don't just look to capitalize on just one game."
"We believe that we can respond in game two," duhang pa ni Kidd.