CEBU, Philippines — Ang Strong Group-Philippine team mipalig-on sa ilang puwersa alang sa 43rd William Jones Cup nga gikatakda karong Hulyo 13-21 didto sa Taiwan.
Kini human gipaslak sa ilang lineup ang naturalized player sa Gilas Pilipinas nga si Ange Kouame ug ang kilas nga guwardiyang si RJ Abarrientos.
Ilang makauban sila si Kiefer Ravena, kanhi PBA champion import Chris McCullough, Jordan Heading, ug Caelan Tiongson.
Si Kouame, kanhi haligi sa Ateneo Blue Eagles sa UAAP ug sakop sa Gilas nga nakadaog og gold medal sa miaging Asian Games, mi-average og 10.2 puntos, 6.5 rebounds, ug 1.7 blocks sa France isip import sa UB Chartres M tropole nga mikumbati s aNationale Masculine 1 club.
Sa iyang bahin, ang kanhi batos sa FEU Tamaraws nga si Abarrientos mipatak og 7.8 puntos ug 2.4 assists matag duwa sa una niyang season uban sa Shinshu Brave Warriors sa Japan B. League.
Sa wala pa manimpad sa Japan, si Abarrientos unang mipakita'g aksiyon sa Korean Basketball League.
Si coach Charles Tiu maoy motimon sa Strong Group-Philippines nga naglaraw mosakmit sa ikapitong Jones Cup title sa nasud.