Bai Hotel Cebu, Shangri-la 3-0 na sa HRRACI basketball

Ang Bai Hotel Cebu ug Shangri-la Mactan Cebu miposte og perpektong 3-0 rekords human sa unang semana sa aksiyon sa basketball sa Hotel Resort and Restaurant Association of Cebu, Inc. (HRRACI) Sportsfest 2024 didto sa Capitol Parish Gym sa may dalan Escario, dakbayan sa Sugbo.

Si Junjay Bation mihipos og 11 puntos, lima ka rebounds, duha ka assists, ug usa ka steal sa dihang ang Bai Hotel miligid sa ikatulo nilang sagunson nga daog luyo sa 57-45 nilang pagkastigo sa Harold's Hotel.

Dako sab og naambag sila si Babmarley Mah ug Joon Bonsukan nga nagkumboya og 17 puntos, walo ka rebounds, ug upat ka assists.

Samtang ang Shangri-la miinat sab sa mainit nilang ratsada ngadto sa tulo ka duwa human gimasaker ang Yello Hotel, 96-30.

Si Jose Miguel Tabaloc maoy nangu sa 66 puntos nga demolisyon sa Shangri-la bitbit ang 22 puntos, unom ka rebounds, usa ka assist, duha ka steals, ug usa ka block.

Sila si Ronald Panaguiton ug Jonathan Canceran nagkumbinar og 27 puntos samtang sila si Nicolas Kyle Magat, Kenneth Glenn Niones, ug Dean Rey Llorente mitali og 10 puntos matag usa sa balanseng ataki sa Shangri-la.

Ang Kandaya Resort, Belmont Hotel, ug Diamond Hotel nagpabilin sab nga way pilde human sa duha ka duwa.   

Si Joshua Villa mipupo og 14 puntos, lima ka rebounds, unom ka assists, ug unom ka steals sa dihang gilat-an sa Kandaya ang Yello Hotel, 98-29, si Kenneth Pamaran mikolekta og 18 puntos, siyam ka rebounds, lima ka assists, ug duha ka steals aron ituboy ang Belmont Hotel ngadto sa 78-63 nga pagpayaka sa Montebello Villa Hotel, samtang si Ruben Ludovice mirehistro og double-double nga 25 puntos ug 13 ka rebounds uban ang upat ka assists, tulo ka steals, ug tulo ka blocks aron tabangan ang Diamond Suites nga makaipsot sa Holiday Inn, 54-53.