CEBU, Philippines — Dul-an sa P130,000 nga ganting salapi ang iapud-apud ngadto sa mga mananaog sa 3rd Hinulawan Joyful Cup Tatluhan and Kiddies Chess Tournament nga gikatakda karong Hunyo 8-9 didto sa CDRRMO Building sa Barangay Poblacion, dakbayan sa Toledo.
Gipaluyohan sa lokal nga kagamhanan sa dakbayan sa Toledo ubos sa liderato ni mayor Marjorie "Joie" Perales, ang duha ka adlaw nga pinug-anay sa utok gipasiugdahan sa Toledo City Sports Commission ug gi-sanction sa Games and Amusements Board (GAB) pinaagi sa Professional Chess Association of the Philippines (PCAP).
Ang makampiyon sa 3-on-3 event (team category) mobulsa og P30,000.
Ang mopahiluna sa ikaduha ngadto sa ikalimang dapit makadawat og P20,000, P10,000, P8,000, ug P5,000, samtang ang malandig sa ikaunom ngadto sa ika-10 nga puwesto mokubra og P3,000 matag usa.
Dunay insentibo nga P2,000 matag usa ang top board players ug top senior, samtang P5,000 ang gitagana alang sa top Toledo ug lady teams.
Sa laing bahin, ang Top 5 sa kiddies (individual) 17 Under age group mokabi og P5,000, P4,000, P3,000, P2,000, ug P1,000.
Ang 6th ngadto sa 10th dunay P500 nga bonus.
Ang top U9, U11, U13, ug U15 ingon man ang top Toledo kiddie ug female players mokubra og P1,000 matag usa.
Limitado lamang ang luna ngadto sa 60 ka teams ug 70 ka mga partisipante sa kiddies division.
Alang sa rehistrasyon ug dugang impormasyon, mahimong mokontak ni FIDE Arbiter Felix Poloyapoy, Jr. (0956-3658682).