MANILA, Philippines — Ang beteranong coach nga si Joerem Yu gitudlo nga head coach sa volleyball grassroots program sa dakbayan sa Naga ning bag-ohay pa lamang.
Sa iyang pagkupot ning maong papel, si Yu gipaabot nga modala sa halapad niyang kasinatian aron paghashas sa abilidad sa mga batan-ong spikers lukop dakbayan.
Andam na kaayo sa bag-o niyang tahas, si Yu mibisita ni mayor Valdemar Chiong aron personal kining pasalamatan sa pagsalig niini sa iyang kapasidad. Gikuyogan siya ni James Garrido sa Department of Education (DepEd)-Naga City Division. “I am very thankful for the trust and overwhelming support not just for my program but for all Naga residents involved in sports. This is the perfect avenue as we have excellent sports facilities available for use," matud pa Yu, nga motabang sab pag-organisa og mga torneyo aron mabaid og maayo kadtong mga potensiyal ug ingon makadiskubre og mga bag-ong talento.
Usa ka dekalibreng coach, si Yu migiya sa pipila na ka mga teams gikan sa nagkadaiyang unibersidad sa Sugbo ngadto sa kalamposan apil niini ang University of Southern Philippines Foundation (USPF) Spiking Panthers. Niadtong 2008, iyang gitimon ang Southwestern University (SWU)-Phinma Lady Cobras ngadto sa korona sa Cebu Schools Athletic Foundation, Inc. (CESAFI).
Gawas sa CESAFI, si Yu mituboy sa Lapu-Lapu City ngadto sa tulo ka titulo sa Governor’s Unity Volleyball (GUV) Cup. Sa miagi niyang pag-coach, si Yu mi-aswat sa Naga men’s team ngadto sa kampiyonato sa GUV Cup.
Tataw nga si Yu dako og maambag ning bag-ong inisyatiba sa Naga sa natad sa paugnat sa kusog.