CEBU, Philippines — Sila si Tyson Fury ug Oleksandr Usyk magbinukbukay na sa makasaysayanong sangka tali sa duha ka mga higanteng boksidor nga mahitabo karong adlawa didto sa Kingdom Arena sa Riyadh, Saudi Arabia. Ilang ilogan ang labing unang undisputed heavyweight title sud sa 25 ka tuig.
Ang modaog moduyog sa halangdon nga mga pangan sama nilang Muhammad Ali ug Mike Tyson kay mamahimong labing unang undisputed heavyweight champion sukad gipilde ni Lennox Lewis si Evander Holyfield niadtong 1999. Si Fury ang nagsul-ot sa bakos sa WBC samtang si Usyk ang nagkupot sa tulo ka mga titulo sa IBF, WBA ug WBO.
Tataw nga usa ka eksplosibong kumbati ang mahitabo tali sa duha ka way pildeng mga kampiyon.
Si Fury nagbitbit og 34-0-1 rekord uban ang 24KOs, samtang si Usyk nagtangag sab og perpektong 21-0 nga baraha uban ang 14KOs.
Alang ni promoter Frank Warren, mao kini ang labing mahinungdanong away sa ika-21 nga siglo.
"It's the fight we've been waiting for - the two best heavyweights in the world, both undefeated," matud pa ni Warren. "This is something special. Fights like this come along once in a generation."