Dekalibreng mga riders mokumbati sa Tabogon motocross

CEBU, Philippines — Usa ka pundok sa dekalibreng mga riders gikan sa nagkadaiyang dapit sa rehiyon ang mopasundayag sa ilang abilidad sa ikaduhang leg sa 2024 MS Motosuit Motocross Series nga giulohan og 2nd Mayor Francis Salimbangon Motocross Cup karong Sabado, Mayo 18, didto sa Barangay Pio sa lungsod Tabogon, amihanang bahin sa Sugbo.

Ang mga beteranong manglumbaay nga sila si PC Gualiza, Clinton Gualiza, Denmar Supatan, Renren Hisoler, ug Jojie Basco nag-una sa listahan sa mga lig-ong partisipante ning usa ka adlaw nga karera nga gituyo aron pagdugang og lamas sa selebrasyon sa tinuig nga pista sa Tabogon agig pagtamod sa minahal nilang patron nga si San Isidro Labrador. Sa kinatibuk-an, 16 ka mga kategoriya ang kumbatihan.

Kini mao ang local enduro, mini 50, local Norte special, novice, ladies 14 Under, elite, open enduro, underbone, beginners open production, mini class open, executive 40-44, 45-49, ug 50-above, ladies open, intermediate, ug expert open.

Gawas sa tropeyo, ang tanang mananaog makadawat sab og ganting salapi.

Sa laing bahin, si MS Motosuit big boss Lou Ornopia mitunol sa mainit niyang pasalamat ngadto sa Tabogon LGU ubos sa pagpangu ni mayor Francis Salimbangon tungod sa pagpaluyo niini sa ilang serye.

"Mapasalamaton kaayo ko ni mayor Francis (Salimbangon) sa hugot niyang suporta ning atong race series," matud pa ni Ornopia, nga kanhi gipasidunggan nga "Sportsman of the Year" sa Sportswriters Association of Cebu (SAC).

"Sa gika-ingon ko na, ato ning gibuhi ang atong lumba aron pagdasig sa atong mga riders nga ma-competitive sila og balik ug labaw sa tanan makasigpat ta og bag-ong mga talento nga mao gyuy nag-una natong katuyoan pagpahigayon ning atong kalihukan," dugang pa ni Ornopia. Human sa Tabogon, si Ornopia mibutyag nga ipahigayon nila ang ikatulo nilang leg karong Hunyo. Gikan niini, mopasiugda pa sila og duha ka mga lumba sa dili pa matapos ang tuig.