Brunson mi-aswat sa Knicks ngadto sa 2-0 nga labaw

CEBU, Philippines — Si Jalen Brunson nakalingkawas sa makuyaw nga sitwasyon sa sayong bahin sa duwa aron pangulohan ang New York Knicks ngadto sa 130-121 nga pagpakaging sa Indiana Pacers nga nakahatag kanila og 2-0 nga bentaha sa ilang best-of-seven NBA Eastern Conference semifinals kagahapon didto sa Madison Square Garden sa New York.

Gipakulbaan sa alas sa Knicks nga si Brunson ang iyang mga kauban human nayayay ang iyang tiil sa unang kuwarter hinungdan nga napugos siya og lingkod sa tibuok nga bahin sa first half.

Gipahimuslan sa Pacers ang kahigayonan aron pagposte og 10 puntos nga labaw sa halftime, nga ilang giinat ngadto sa 12 puntos sa sayong bahin sa ikatulong kuwarter human sa layup ni Andrew Nembhard. Apan nausab ang timpla sa duwa pabor sa Knicks sa dihang mitikang og balik sa korte si Brunson.

Luyo sa pagpanginit ni Brunson, gilabhan sa Knicks ang Pacers sa ikatulong kuwarter, 36-18, aron pagposte og 99-91 nga labaw sa pinal nga 12 minutos sa aksiyon.

Wala na molingi pa sukad niadtong ang Knicks.

Si Brunson mitapos uban ang 29 puntos ug lima ka assists samtang sila si Donte DiVincenzo ug OG Anunoby mibubo og 28 puntos matag usa alang sa Knicks.

Dako sab og naambag si Josh Hart nga mihipos og 19 puntos ug 15 ka rebounds ingon man si Isaiah Hartenstein nga mipupo og 14 puntos, 12 ka rebounds, ug walo ka assists. Si Tyrese Haliburton mipabuto og 34 puntos, samtang sila si Nembhard, Pascal Siakam, ug Obi Toppin nagkumboya'g 49 puntos apan nakawang ang ilang paningkamot sa habig sa Pacers.