Bangiitang kampiyon sa amateur Macado buot dad-on iyang kalamposan sa pro boxing

CEBU, Philippines — Sa dihang mitikang siya sa tugkaran sa ARQ Stable sa Sugbo sa labing unang higayon duha ka tuig na ang milabay, usa pa siya ka wala mailhi nga boksidor.

Apan wala mahibaw-i sa mga Sugbuanong fans, si Ramil "The Sharp" Macado, Jr. nagbitbit uban kaniya og impresibong kredensiyal.

Kanhi amateur standout nga nanghawod sa national ug international nga mga kompetisyon, si Macado unang mikulit og pangan sa dihang iyang gipatikangkang si Martin Cordova sa ikatulong hugna aron sakmiton ang gold medal sa men's light flyweight division sa Philippine National Games (PNG) niadtong Marso 11, 2016 didto sa Narciso Ramos Sports and Civic Center sa Lingayen, Pangasinan.

Tungod niini, si Macado naapil sa listahan sa tadhang mga kampiyon sa torneyo nga naglangkob nilang Tokyo Olympics silver medalist Carlo Paalam, ang way pildeng IBO ug WBA Asia South flyweight champion Dave "Dobermann" Apolinarion, ug Criztian Pitt Laurente, nga sa kasamtangan nagkupot og perpektong reord isip super featherweight contender.

Tulo ka semana pa lamang ang milabay, ang garbo sa Koronadal City, South Cotabato mihimo og impresyon atubagan mismo sa iyang mga katagilungsod sa dihang iyang gikulata si Prince Rodhenmar Mesa aron paglugwa nga kampiyon sa Private Schools Athletic Association (PRISAA) National Games.

Sa sunod nga duha ka tuig, giusban ni Macado ang bulawanon niyang salida sa PNG sa dihang nakaipsot siya batok ni Kit Cenon Garces pinaagi sa split decision sa men's light flyweight finals niadtong April 25, 2018 didto sa Cebu Coliseum.   

Paglabay sa tulo ka tuig, nabira niya ang labing una niyang gold medal sa internasyonal nga torneyo atol sa Kapolri Cup didto sa Manado, Indonesia.

Nindot sab ang gipakitang labok ni Macado sa India Open International Boxing Tournament ug sa President's Cup didto sa Astana, Uzbekistan niadtong 2018. Nakapakita sab siya og aksiyon sa Greece ingon man sa Thailand diin siya nakaabot sa quarterfinals sa 2019 ASBC Elite Boxing Championships didto sa Bangkok.

Si Macado midaog sa katapusan niyang duha ka away isip amateur batok nilaqng Kornelis Langu ug Zhonglin W. nga parehong gipahigayon didto sa Shanghai, China upat ka tuig na ang milabay.

Sama sa ubang mga atleta, nahunong ang karera ni Macado tungod sa pagulbo sa kalibutanhong pandemiya.

Apan nakakita siya og dan-ag sa paglaum sa dihang ang ARQ Gym ni sports patron Jason Arquisola mipasud kaniya sa ilang pultahan.

Gipamatud-an dayon ni Macado ang iyang katakos sa dihang iyang gipalukapa si John May Acope sa ikaunom nga hugna sa iyang pro debut niadtong Marso 19, 2020 didto sa Alta Vista Golf and Country Club sa Barangay Pardo, dakbayan sa Sugbo.

Sukad niadto, wala pa siyay pilde sud sa walo ka away uban ang 4KOs.   

"Dako kaayo ko og pasalamat nga nakasud ko dire sa ARQ Stable. Blessed kaayo ko na naka-manager ko sama ni sir Jason (Arquisola) na grabe kabuotan ug grabe motabang namo tanan. Kon dili pa tungod sa ARQ, wa gyud unta ko nakapadayon sa akong pangandoy mao dako kaayo akong pasalamat sa Ginoo nga dire ko niya gibutang," matud pa ni Macado.

Karon, ang 28-anyos nga si Macado magsagubang sa labing lisud nga hagit sa iyang karera.

 Iyang sangkaon ang way pilde sab nga si Lawrence "Shotgun" Dumam-ag alang sa WBO Oriental flyweight title sa main event sa giatngan nga “Engkwentro 13" sa ARQ Sports Promotions karong Mayo 1 didto sa Mandaue City Cultural and Sports Complex.

"Special ni nga fight para nako ug thankful kaayo ko nahatagan ko og ing-ani nga break," padayag pa ni Macado. "Kompiyansa ko nga modaog gyud ko aning awaya kay taas-taas among preparasyon ug amo ni gipangandaman og maayo."