Irwin uypitching mihatag og balik sa Ornopia Cup

CEBU, Philippines — Si Irwin Noel Ramas Uypitching mikulit og pangan sa Philippine sports pinaagi sa motocross racing.

Karon, panahon na nga mohatag og balik alang ning champion sportsman nga usa na karon ka establisadong magpapatigayon.

Tungod niini, si Uypitching midonar og usa ka brand new nga RUSI Moped 125cc motorcycle aron i-raffle sa giatngan nga 25th Ornopia Motocross Cup nga gikatakda karong Abril 14 didto sa MS Motosuit Motorsports Park sa Barangay Calambua, San Remigio, Cebu.

"Time to pay it forward for old times sake knowing that Ornopia Cup is a prestigious event and has played a big part of my motocross racing career for several years," matud pa sa 44-anyos nga Dumagueteño.

Sa mabulokon niyang panahon isip rider, si Uypitching misakmit sa expert ug intermediate division titles sa 2000 PLDT National Supercross Series.

Niadtong tungora, sakop siya sa Shell-Yamaha national team human gi-recruit ni Dan Ramirez. Dekalibre ang iyang mga kauban nga naglangkob nilang Jovie Saulog, Ernie Leongson, Popeye Rubi, Jing Leongson, Jolet Jao, and Weng Yaparcon.

Sa sunod nga tuig, nakabira siya og laing duha ka korona sa 2001 WGA National Supercross Series.

Nakasustinir si Uypitching sa dalaygon niyang ratsada. Nakahakot siya og duha ka tropeyo sa kampiyonato niadtong 2007 ug 2008 seasons sa MS Motosuit Motocross Series nga giorganisa si Lou Ornopia, ang giyukboang amahan sa Cebu motocross. Naghimo kini kaniyang back-to-back "Rider of the Year" awardee sa Ornopia Cup niadtong mga tuig.

Human niini, hinayhinay siyang mibiya sa paglumba aron makapokus sa negosyo sa ilang pamilya.

Dili naman tuod siya aktibo isip usa ka atleta apan si Uypitching naglantaw sa iyang kaagi uban ang mapasalamaton nga kasingkasing.

Mao kini ang hinungdan nganong mihatag dayon siya og suporta sa Ornopia Cup alang sa mahinungdanon nilang lumba agi'g kasumaran sa ika-25 niining anibersaryo dungan sa kapistahan sa Calambua agi'g pangilin sa minahal nilang patron nga si San Vicente Ferrer.

Labaw sa tanan, ang general manager sa Rusco Motors Inc. mipadayag sa mainiton niyang pasalamat ngadto ni Ornopia tungod sa way puas niining paningkamot alang sa promosyon ug paglambo sa motocross sud sa nanglabayng mga katuigan.

"Boss Lou did a great job in organizing and promoting the Ornopia Motocross Cup and maintaining it for several years despite all the trials he encountered. His commitment to the sport is extraordinary. New and upcoming riders are developed and talents are discovered because of this event. Salute to him for a job well done," dason pa ni Uypitching.

Niadtong mga gusto mosunod sa iyang tunob, si Uypitching mipaambit og usa ka bulawanong mensahe

"Passion, discipline, focus, and dedication in motocross must be present. Practice makes perfect. Just keep on riding until you are one with the bike. Don’t give up. Make each defeat a learning block and plan how to overcome it. Have goals and direction and results will eventually come," panapos pa ni Uypitching.