CEBU, Philippines — Si Myles Turner mi-iskor og 24 puntos sa dihang gipakgang sa Indiana Pacers ang tulo ka sunod-sunod nga daog sa Oklahoma City Thunder, 121-111, sa NBA kagahapon didto sa Paycom.com Arena sa OKC.
Balanse kaayo ang ataki sa Pacers hinungdan nga ilang napiog ang higanteng koponan gikan sa Western Conference.
Gawas ni Turner, dako sab og naambag si Tyrese Haliburton nga mipupo og 18 puntos ug siyam ka assists ingon man si Pascal Siakam nga midugang og 18 puntos ug 11 ka rebounds alang sa Pacers nga ikaunom na karon sa East uban ang 37-29 rekord.
Si Shai Gilgeous-Alexander mikolekta og 30 puntos, 10 ka rebounds, ug lima ka assists alang sa Thunder, nga nagtabla na karon ug ang Denver Nuggers sa liderato sa West bitbit ang managsamang 45-20 nga baraha.
Sa laing bahin, ang Boston Celtics misidlak gihapon bisan og wala ang tulo nila ka mga sinaligan nga sila si Kristaps Porzingis, Jaylen Brown ug Al Horford.
Luyo sa pagpanginit ni Jayson Tatum, gibugha sa Celtics and Utah Jazz, 123-107.
Si Tatum miharog og 38 puntos human mipasud og 13 sa 25 niya ka itsa.
Mihimo sab og kasikas si Derrick White uban ang 24 puntos alang sa Celtics nga mikadlit sa ika-51 nilang daog.
Didto sa Sacramento, sila si De'Aaron Fox ug Malik Monk parehong mitali og 29 puntos sa dihang gipaluhod sa Kings ang Milwaukee Bucks, 129-94.
Samtan ang Minnesota Timberwolves mipupo sa ika-45 nilang daog human gipayaka ang Los Angeles Clippers, 118-100.
Didto sa New York, nagpadayon ang problema sa Philadelphia 76ers human sila nahagba sa mga kamot sa Knicks, 106-79.
Ang Sixers nasugamak sa nikaunom nga pilde sa miagi nilang 10 ka duwa.
Sila si Josh Hart ug Jalen Brunson mirehistro og 20 puntos matag usa alang sa Knicks nga dominante kaayo ug sa usa ka higayon mi-abante og 33 puntos.