CEBU, Philippines — Si Stephen Curry milansang og unom ka 3-pointers sa iyang 32 puntos uban ang walo ka assists sa dihang gilampaso sa Golden State Warriors ang Los Angeles Lakers nga wala si LeBron James, 128-110, sa NBA kagahapon didto sa Chase Center sa San Francisco, California.
Uban ang ika-6,000 nga assist sa iyang karera, si Curry nahimong ikawalo nga player sa kasaysayan sa NBA nga adunay dili mominus 23,000 puntos ug 6,000 ka assists sunod nilang James, Russell Westbrook, Kobe Bryant, James Harden, Oscar Robertson, Jerry West ug John Havlicek.
Mibomba siya og 16 puntos sa unang kuwarter aron tabangan ang Warriors pagposte og 67-56 nga labaw sa halftime. Tayming kaayo ang pagmangtas ni Curry gumikan kay ang "Splash Brother" niyang si Klay Thompsyon namugnaw ug mihipos lamang og tres puntos uban ang lima ka assists ug upat ka rebounds.
Nakakuha hinoon si Curry og dakong suporta gikan ni Andrew Wiggins nga mipupo og 20 puntos ingon man ni Trayce Jackson-Davis nga mitali og 17 puntos atol sa ika-24 nga sumad sa adlaw niyang natawhan.
Si Jonathan Kuminga midonar og 12 puntos alang sa Warriors nga midaog sa ikasiyam nga higayon sa miagi nilang 11 ka duwa. Si Anthony Davis miharos og 27 puntos ug 15 ka rebounds samtang si D Angelo Russell mikimada og 18 puntos, siyam ka assists ug lima ka rebounds apan naminghoy silang duha kay naputol ang tulo ka sunod-sunod nga daog sa Lakers.