Mga kampiyon magbugno sa sibugay UV Lancers mosakbang sa La Salle Archers

CEBU, Philippines — Lab-as pang mibira sa una nilang korona ning tuiga, masukod ang katakos sa University of the Visayas (UV) Green Lancers isip labing maayong collegiate ballclub sa Sugbo sa dihang ilang sangkaon ang La Salle Green Archers sa kulbahinam nga engkwentro tali sa mga kampiyon sa 2nd Gov. Ann K. Hofer Open Invitational Basketball Tournament karong adlawa (Huybes, Pebrero 15) didto sa Capitol Sports Complex sa Zamboanga Sibugay.

Mag-abot ang duha ka dekalibreng puwersa sa alas-9 sa gabii, human ang National University (NU) Bulldogs ug ang Titay Valenzuela magpinaksitay sa pasiunang aksiyon sa alas-7 sa gabii.

Ang Lancers, nga nanghawod sa Bulacao Invitational Tournament sa siyudad sa Sugbo niadto lamang miaging semana, mao ang two-time defending champion sa Cebu Schools Athletic Foundation, Inc. (CESAFI).

Si coach Gary Cortes mopadara og susamang UV lineup nga midominar sa CESAFI Season 23 sa miaging tuig ubos sa pagpangu nilang season MVP Kent Ivo Salarda, star guards AJ Sacayan ug Jimpaul Amistoso, Raul Gentallan, ug Ivan Clark Alsola.

Mopalig-on sa ilang kampo sila si Bassieru Sackor, Ted Saga, ug 2022 CESAFI MVP Jiesel Tarrosa.

Ang Lancers gipaabot nga magsagubang og malisud nga tahas batok sa Green Archers, ang kasamtangang kampiyon sa UAAP luyo sa liderato ni season ug Finals MVP Kevin Quiambao.

Human sa La Salle, ang Lancers makigharong sa NU Bulldogs ug Alicia KSB Glass sa dili pa tak-opon ang ilang kampanya sa eliminasyon ning lima ka adlaw nga torneyo nga modalit og P700,000 sa makampiyon batok sa Titay Valenzuela karong Sabado, Pebrero 17.