Torregosa misidlak dayon sa iyang marathon debut
CEBU, Philippines — Ang Mindanaoan runner nga Artjoy Torregosa mihimo sa labing una niyang paglumba sa 42 kilometro nga distansiya nga mahinungdanon ug dili mahikalimtan human iyang gisakmit ang korona sa women's division sa malampuson nga Cebu Marathon 2024 kagahapong adlawa didto sa SM Seaside City agi sa Cebu-Cordova Link Expressway (CCLEX).
Ang 24-anyos nga si Torregosa, lumad gikan sa Las Nieves, Agusan del Norte, mitapos nga labing paspas sa tanang babaye nga mga entrante. Iyang gihuman ang makutas nga karera sud sa tulo ka oras, 12 minutos, ug 14 segundos.
Si Maricar Camacho mipahiluna sa ikaduhang dapit sa oras nga 3:14:39 samtang si Jennylyn Nobleza nalandig sa ikatulong puwesto sa oras nga 3:18:41.
Sa men's open, ang 40-anyos nga Kenyan nga si Eric Chipsiror mibira sa ikaunom niyang titulo human mirehistro sa labing nindot nga oras nga 2:13:50. Mas paspas kini og 14 minutos sa gipatak niyang oras sa miaging tuig diin siya sab ang nakampiyon.
Si Florendo Lapiz ang nagsunod ni Chipsiror sa oras nga 2:35:37, samtang ang laing Kenyan nga si Joseph Mururi ang na-3rd sa oras nga 2:42:19.
Sa laing bahin, si Christine Hallasgo, nga labing mahinumduman gumikan sa pagtapos niya sa dominasyon ni Mary Joy Tabal isip rayna sa marathon sa nasud, milumba sa 24K ning higayona ug midaog siya sa oras nga 1:40:14. Sila si Cherry Andrin (1:46:53) ug Lany Adaoag (1:52:12) ang mi-okupar sa ikaduha ug ikatulong puwesto.
Sa 12K, ang top 3 mao sila si Ritche Estampador (40:33), Rogen Aguire (40:50), ug Dhem AJ Monton (41:33) sa men's, ug Joida Gagnao (47:36), Kyung A Kang (47:54), ug Karen Manayon (50:59) sa women's.
Sila si Mark Mahinay ug Asia Paraase mikuha sab og atensiyon human nanghawod sa 6K uban ang oras nga 20:97 ug 25:37.
- Latest
