Toledo-Xignex napakyas sa PCAP national finals
CEBU, Philippines — Ang Toledo-Xignex Trojans napakyas sa ilang tinguha nga mosuwat og laing kasaysayan.
Kini human ang Southern Conference champion gipaluhod sa lig-on kaayo nilang karibal sa North, ang Pasig City King Pirates, atol sa national finals sa Professional Chess Association of the Philippines (PCAP) Season 3 SGM Wesley So Cup nag giduwa niadtong Sabado sa gabii, Disiembre 9, pinaagi sa chess.com.
Tungod niini, ang Pasig milabni sa ikaupat nilang korona sa PCAP. Ilang gipayaka ang dili sab kabintahaan nga Trojans sa iskor nga 13-8 ug 12.5-8.5 sa duha ka set nilang sangka sa kampiyonato.
Ang King Pirates maoy unang mipadanak og dugo human gipaksit ang Toledo, 6-1, sa blitz ug dayon mipuwersa og 7-7 nga panagtabla sa rapid play sa unang duwa.
Si Woman National Master Rowelyn Acedo miwani ni Woman FIDE Master Cherry Ann Mejia, si International Master Cris Ramayrat mibihag ni National Master Edmundo Gatus, si Jerome Villanueva milupig ni Toledo team captain Bonn Rainauld Tibod, si Kevin Arquero mipatigbabaw ni IM Kim Steven Yap, ug si IM Eric Labog Jr. mibugha ni NM Allan Pason alang sa lima ka daog sa mga Pasigueños, samtang nakatabla sila si Grandmaster Mark Paragua batok ni FM David Elorta ug GM Gombosuren Munkhgal batok ni GM Richard Bitoon.
Sa ikaduhang duwa, ang Pasig midaog sa blitz chess, 6.5-0.5, luyo nilang Paragua, Munkhgal, Arquero, IM Eric Labog Jr. ug Mark Kevin Labog ingon man sa usa ka tabla gikan ni WFM Sherily Cua.
Sa rapid chess, ang Toledo nakabawos batok sa Pasig, 8-6, apan mao ra kini ang labing nindot nilang nahimo.
Sa gihapon, ang Trojans mapasigarbuhon tungod sa pagkulit nila og kasaysayan isip labing unang Cebu team nga naka-abot sa national finals sa malisud nga torneyo nga gisalmotan sa labing tang-an ug labing hait nga mga chess players sa nasud.
- Latest
