Carcueva 'double champion' na sab sa 2rd Mayor Romeo Bike Fest
CEBU, Philippines — Ang propesyonal nga seklistang si Junreck Carcueva milampos pagdepensa sa duha niya ka trono sa 2nd Mayor Romeo Villaceran Bike Fest 2023 nga gipahigayon didto sa lungsod saMadridejos, isla sa Bantayan ning bag-ohay pa lamang. Si Carcueva, nga sakop sa Team Williams, midominar sa road bike ingon man sa mountain bike open elite category sa usa ka adlaw nga kompetisyon nga hiniusang giorganisa sa Madridejos Cycling Club (MACYC), Sikad de Madridejos, ug Madridejos Sports Club.
Gilupig ni Carcueva sila si Cedric Cabahug sa Indianos ug Clent Detalla sa UTB aron langkaton ang titulo sa RB open ug dayon giwani sila si Roy Carbonera sa VCC ug Exequel Arreglo sa Laklak aron paghari sa MTB open.
Sa RB Islahanon, si Rodhoward Orbeta sa MACYC maoy milugwa nga kampiyon. Sila si Marlou Nicco Pua sa BMB ug Russel Oflas sa MACYC mipahiluna sa ikaduha ug ikatulong dapit. Si Oflas hinoon maoy nanghawod sa sa MTB 18-32 age group.
Sa MTB women's division, si Lovely Gitaruelas sa 3MCycle ang koronahang hara human gibuntog sila si Lynnel Martus sa BMB ug Vianne Pagnanawon sa Team Williams nga maoy mo-okupar sa nagsunod nga duha ka puwesto.
Sa laing bahin, ang dugay na kaayong tigpaluyo sa cycling nga si Keith Defiebre mipupo og duha ka tropeyo sa kampiyonato sa MTB 33-45 ug 46-above age group, samtang si Juanito Gilbuela sa MACYC nalandig sa unang dapit sa MTB 17-under.
- Latest
