Toledo-Xignex Trojans mihimo'g kasaysayan sa PCAP

CEBU, Philippines — Ang Toledo-Xignex Trojans misuwat og kasaysayan human sila mitikang sa Southern Conference finals sa torneyo sa Professional Chess Association of the Philippines (PCAP) sa labing unang higayon. Ang mga pambato sa Sugbo gikan sa dakbayan sa Toledo milupig sa Davao Durianburg Stallions sa duha ka set nilang sangka sa semifinals aron pagmartsa ngadto sa kampiyonato sa Southern division sa  PCAP Season 3 SGM Wesley So Cup.

Ubos sa pagpangu nilang FIDE Master David Elorta, International Master Kim Steven Yap, team captain Bonn Rainauld Tibod, ug Allan Pason, ang Toledo-Cignex milubong sa Davao Durianburg sa unang set, 15.5-5.5, sa wala pa hingpit nga gipatikangkang ang Stallions sa ikaduha nilang panag-abot sa sikit nga desisyon, 11.5-9.5. Sila si Grandmaster Richard Bitoon, Woman FM Cherry Ann Mejia, IM Rico Mascarinas, ug Edmundo Gatos mihimo sab og kasikas sa impresibong kadaogan sa Trojans.

Ang Toledo-Xignex makigharong sunod batok sa init kaayo nilang karibal nga Iloilo Kisela Knights alang sa korona sa South karong Disiembre 6.  Ang Kisela Knights mi-abante sa finals human gipalagpot ang Surigao Fianchetto Checkmates pinaagi sa Armageddon tiebreaker.