CEBU, Philippines — Temporaryong nagsawo sa ikaduhang dapit sa standing ang Goutsource Solution International (GSI) ug Cebu Grand Prix human sa ilang kadaogan batok sa managlahi nilang kaatbang sa Donling Cup 2024 sa miaging gabii diha sa Ateneo de Cebu old campus sa Mango Avenue, Cebu City.
Ang GSI nidaog sa JLT Sorbeteros, 52-48 ug ang Cebu Grand Prix midaog sab og kuwatro puntos sa Gavens Water Refilling Station sa iskor nga 49-45. Sa kasamtangan, ang GSI ni Ivan Llesol ug Cebu Grand Prix ni Errol Mendoza adunay 3-1 records sa maong liga nga gidumala sa Brothers Ball League ubos sa pagpangulo ni Marvin Sillar.
Ang trayanggulo nilang Dan Cardenas, VM Cempron ug Ernie Inocencio nga nagkumbinar og 58 puntos maoy gabayan sa GSI nga pirmeng naglabaw gikan sa pagsugod ngadto sa third quarter. May purohan untang makatabla ang JLT dihang mipatuman kini'g full court defense, apan pakyas kay si JJ Vestra nakakawat og bola sa nahabiling 28 segundos.
Ang best player nga si Cardenas ang nangu sa GSI uban ang 24 points, 6 rebounds ug 8 assists, ug ang nangu JLT ni Jack Leonard Tagacanao mao si Alex Barcoso Jr. pinaagi sa iyang 20 puntos.
Sa laing bahin, ang Cebu Grand Prix gipangulohan sa best player nilang si Roldan Daug nga dunay 18 puntos, walo ka rebounds ug tulo ka assists, samtang si Scott Kier Alindajao mao sab ang nangu sa Gavens ni Kevin Mamac sa iyang 14 puntos. Midaog sab ang JMD Automotive ni Gerald Dilao sa pagpangu sa best player nilang si Jerico Rosales nga mikamada'g 11 puntos, 10 rebounds ug upat ka assists. Si Bernie Bryle Da o nga dunay 10 puntos mao sab ang topscorer sa Bucket Blazers ni Chyrus Blen.