CEBU, Philippines — Nakaikyas ang Cebu Grand Prix uban ang 57-50 nga kadaugan batok sa Bert Enterprises sa Donling Cup 2024 sa miaging gabii diha sa Ateneo de Cebu old campus sa Mango Avenue, Cebu City.
Sila si Roldan Daug, Lucky Mendoza, Jykell Atillo ug Jhon Wiser Medina ang responsabli sa kadaugan sa Cebu Grand Prix ni Errol Mendoza kay human magtabla sa sikit nilang duwa, 43-43 sa katapusang 8.3 minutos sa fourth quarter, mipasiugda sila'g hiniusang rally aron buntugon ang Bert Enterprises ni Gilbert Sabal.
Hinuon, si Daug nga dunay 16 points, 7 rebounds ug 3 assists maoy topscorer ug best player of the game. Si Mendoza miamot og 10 puntos Ang Bert Enterprises nga wala na makabawi gipangulohan nilang Eugene Rosaldo ug Charlee Lumasag nga parehong mitimbre'g 13 puntos, gisundan ni Darwin Nara nga mitamla'g 11 puntos. Sa pasiunang duwa, ang Donling Aircon and Refrigeration Services milansang sa ilang ikaduhang sunod-sunod nga daog pinaagi sa paglubong sa CJL Sniper, 60-48.
Si Ace Despi nga maoy best player ang nangu sa daog uban ang 13 puntos, siyam ka rebounds ug unom ka assists. Si Kenaz Balderas mitampo'g 10 puntos alang sa team ni Don Quilaton.
Nangu sa CJL ni James Lapinig mao si CJ Monterola sa iyang 14 puntos, gisundan ni Nico Cojo nga dunay 11 puntos.
Ang Donling ug Cebu Grand Prix duna nay 2-1 win-loss records, samtang ang CJL ug Bert Enterprises parehong nagbitbit og 1-1 nga baraha ning maong liga nga gipadagan sa Brothers Ball League ubos sa superbisyon ni Marvin Sillar.