Sangka sa mga way pilde Lancers miwani sa Webmasters, 7-0 na sa CESAFI Basketball
CEBU, Philippines — Ang defending champion University of the Visayas (UV) Green Lancers milusag og eksplosibong opensiba sa ikatulong kuwarter aron tumbahon ang University of Cebu (UC) Webmasters, 67-55, sa sangka tali sa mga way pildeng koponan sa Cebu Schools Athletic Foundation, Inc. (CESAFI) Season 23 Men's Basketball Tournament niadtong Sabado didto sa Cebu Coliseum.
Si Kent Ivo Salarda mirehistro og double-double uban ang 13 puntos ug 13 ka rebounds samtang si Raul Gentallan midugang og 11 puntos alang sa Lancers nga miilog sa solong liderato sa college division bitbit ang perpektong 7-0 rekord.
"Ang among mga bata eager lang gyud modaog. Hope this will continue until the end of the season," matud pa ni Lancers head coach Gary Cortes nga naglaraw sa ikapito niyang sagunson nga pagtaak sa finals sukad niadtong 2015.
Sikit pa una ang kumbati sa first half apan ang Lancers, luyo sa pagpanginit nilang Salarda, Gentallan, Jimpaul Amistoso ug Froiland Maglasang, nagtambayong pagtagak og 22-5 nga bomba nga nakahatag kanila sa labing dako nilang labaw nga 19 puntos,58-39, sa nahiniling tres minutos sa ikatulong kuwarter.
Wala na molingi pa sukad niadto ang Lancers nga nakamintinar sa komportable nilang bentaha, 67-49, sa 3-pointer ni Salarda sa pinal nga 1:15.
Na-angklahan sa hugot nga depensa sa Lancers, si Ricofer Sordilla nabokya human mirapido og 16 puntos sa first half alang sa Webmasters. Si Danie Boy Lapiz mitunol og 10 puntos apan way nahimo gumikan kay naputol na gyud ang nagkadenang walo ka daog sa UC.
Sa laing aksiyon, ang University of Southern Philippines Foundation (USPF) Panthers nakaipsot sa University of San Carlos (USC) Warriors, 59-56. Sila si Neon Chavez ug Peter John Peteros nagkumbinar og 25 puntos alang sa Panthers nga nakigduyog sa University of San Jose-Recoletos (USJ-R) Jaguars sa ikatulong puwesto bitbit ang managsamang 5-2 nga baraha.
Sa high school division, ang University of San Jose-Recoletos (USJ-R) Baby Jaguars milampaso sa Cebu Institute of Technology-University (CIT-U) Baby Wildcats aron pagkatkat sa ikatulong dapit uban ang 5-1 rekord, samtang ang Cebu Eastern College (CEC) Blue Dragons mipaksit sa USPF Baby Panthers, 77-68, aron pagpuwersa og triple tie uban sa University of Cebu (UC) Baby Webmasters ug University of the Visayas (UV) Baby Lancers sa ikaupat nga dapit uban ang parehong 5-2 nga marka.
- Latest
