CEBU, Philippines — Duha ka mga bata nga Sugbuanong martial artists nga toa na karon nagbase sa Amerika ang nagsugod na og kulit sa ilang mga pangan sa natad sa jiu-jitsu.
Ang managsoong Jared ug Jansen Tan, nga lumad gikan sa Barangay Tisa, dakbayan sa Sugbo, mipakita og igong katakos aron pagsakmit og medalya sa Abu Dhabi World Professional Jiu-Jitsu Championship 2023 nga gipahigayon didto sa Mubadala Arena sAbu Dhabi, United Arab Emirates ning bag-ohay pa lamang. Ang otso anyos nga si Jared milangkat og gold medal sa 30kg category, samtang ang maguwang niyang si Jansen, 10, mitapos sa ikatulong dapit taliwala sa 19 ka mga partisipante aron pagbira og bronze sa infant (27kg) weight class.
"I trained so hard for this tournament and I'm very happy to win the gold because my hardwork paid off," matud pa ni Jared.
Susama sab ang gibating kalipay ni Jansen sa kalamposan nga ilang natagamtaman. "Though it wasn’t the result I wanted I'm still happy because I gave my all on the mat. I'm so grateful to be in the podium," paambit pa ni Jansen. Ang managsoong Tan gi-train ni professor Taniel "Abu" Jesus sa Nature Brazilian Jiujitsu Academy didto sa Sanford, North Carolina.
Pareho silang nangambisyon nga mamahimong inila nga mga black belters sa umaabot.