"Tapok-Tapok" sa bayfront Doce Pares global training camp misikad na

CEBU, Philippines — Kapin sa 50 ka eskrima masters gikan sa nagkadaiyang dapit sa kalibutan ang ania karon sa dakbayan sa Sugbo aron pagsalmot sa Doce Pares Training Camp 2023 nga gikatakda sa Oktubre 19-21 didto sa Bantayan Hall sa Bayfront Hotel-North Reclamation.

Gawas sa host Philippines, ang mga partisipante sa tulo ka adlaw nga kalihukan nga giulohan og "Tapok-Tapok Eskrimador Doce Pares Multi-Style System" nagagikan sa Amerika,  Australia, Hungary, Germany, ug United Kingdom.

Giorganisa kini sa presidente sa Doce Pares nga si Supreme Grandmaster Arnulfo  Dong  Cuesta inabagan sa bise presidente niyang Grandmaster Eric Mosqueda, manghud niining si GM Erwin Mosqueda, nga maoy nagtukod sa Doce Pares Los Angeles niadtong 2004, ug Philippine Eskrima Kali-Arnis Federation (PEKAF) Vice President Master Gerald Ca ete.

"We are holding this activity because we want to further promote and enhance our curriculum as a multi-style system of Doce Pares," matud pa ni New Jersey-based Cuesta, nga maoy mikupot sa liderato sa Doce Pares human sa kamatayon ni Supreme Grandmaster Atty. Dionisio  Diony  Ca ete, ang tinamod nga lider sa organisasyon, duha ka tuig na ang milabay.

Usa ka Cebu Sports Hall of Famer, si Diony Ca ete maoy responsable sa pagpalambo ug paghimo'g maanindot nga kausaban ning taglagsaon nga Pinoy martial art nga nagagikan dinhi mismo sa Sugbo hangtud nga nahimo kining usa ka respetado ug sikat nga kahugpongan sa tibuok kalibutan nga karon aduna nay kapin sa 40 ka nasud nga mga miyembro. Ug si Cuesta madasigon kaayo nga ipadayon ang legasiya ni SGM Diony sa ingon dili mahikalimtan ang pangan niini sa umaabot pang mga henerasyon.

"Right now, there are a lot of Doce Pares clubs all over the world. Through this endeavor, we hope to create a unified system as envisioned by the late SGM Diony Ca ete during his lifetime," padayon pa ni Cuesta. "In this manner, we are also keeping his legacy alive, which is really our main purpose in coming up with this undertaking."

Sa iyang bahin, si GM Erwin Mosqueda, nga usa sa labing hait ug bangiitan nga mga estudyante ni SGM Diony, doble ang kalipay gumikan kay ang gipasiugdahan nilang aktibidad kabahin man sab sa selebrasyon sa ika-19 nga  anibersaryo sa Doce Pares LA.

"We are here not only to introduce new techniques and strengthen our curriculum but also get to know each other well and along the way foster fellowship and camaraderie as one big Doce Pares family. This is also the best way we know to remember the life and works of SGM Diony, who was a great pillar of Doce Pares," dason pa ni Mosqueda.