UP Cebu milansang og makasaysayanong daog

CEBU, Philippines — Ang University of the Philippines (UP) Cebu Fighting Maroons mikadlit sa makasaysayanon nilang unang daog sa Cebu Schools Athletic Foundation, Inc. (CESAFI) basketball pinaagi sa sikit nga desisyon, 53-50, batok sa Southwestern University (SWU)-Phinma Cobras niadtong Domingo didto sa Cebu Coliseum.

Alkansi ang Fighting Maroons og kuwarto pountos human sa tulo ka kuwarter, 36-40, apan milusad og madasigon nga resbak sa naghinapos nga bahin sa duwa aron pagkangon ang upat ka sagunson nilang malas.

Salamat sa pagmangtas ni Harvey Caño, nga mitagak og otso sa iyang 18 puntos sa katapusang kuwarter diin giwani sa Fighting Maroons ang Cobras, 17-10, aron angkono ang labing una nilang daog sa liga.   

"It was a good win for us and we are all happy for our first historic win," matud pa ni UP Cebu head coach Rommel Rasmo, usa sa labing daogan nga mga coaches sa CESAFI bitbit ang unom ka kampiyonato uban sa Sacred Heart School-Ateneo de Cebu (SHS-AdC) Magis Eagles sa juniors division diin siya gihapon ang nagdala hangtud karon.

"We will continue to work on our development as a team because I believe that my players could play better as they keep on improving. We are grateful for the support of the UP community most especially to our beloved chancellor Atty. Leo Malagar," dugang pa ni Rasmo.

Sa laing bugno, ang Cebu Institute of Technology-University (CIT-U) Wildcats miposte sa una nilang daog human gikastigo ang Felipe R. Verallo Foundation College (FRVFC) Blue Dragons, 83-71.

Si John Rey Guinita mipabuto og 26 puntos samtang sila si Edwin Charles Jao ug Jim Brent Taala mipupo og 14 ug 12 puntos alang sa Wildcats nga miputol sa tulo ka sunod-sunod nilang pilde.

Sa juniors level, ang Cebu Eastern College (CEC) Blue Dragons mingmakmak sa CIT-U Baby Wildcats, 65-44, aron pagsolo sa ikatulong dapit uban ang 4-1 nga baraha samtang ang University of San Carlos (USC) Baby Warriors nakadimdim na gyud sa katam-is sa kadaogan human gipayaka ang Don Bosco Technical College (DBTC) Greywolves, 64-57.