Dalaygon nga programa

CEBU, Philippines — Ang ika-11 nga edisyon sa One Cebu Island Governor Gwen Garcia Unity Volleyball (GUV) Cup misikad na kagahapong adlawa didto sa Mandaue City Cultural and Sports Complex diin gipakita na sab niini ang usa ka dalaygong programa sa grassroots nga sud sa pipila ka mga katuigan nahimong hulmahan sa pipila ka mga bitoon sa voleyball sa nasud.

Nadan-agan kini og samot uban sa pagbalik sa kids division ning lukop probinsiya nga torneyo nga giorganisa sa Cebu Volleyball Association (CEVA) ubos sa liderato ni Francis Chad Salimbangon.

Kining kategoriya alang sa siyete ngadto sa 12 anyos nga mga spikers nakakuha og partisipasyon gikan sa 22 ka teams sa nagkadaiyang dapit sa Sugbo.

Sa kinatibuk-an, 120 ka teams ang mag-ilog sa kinatas-ang dungog sa tagsa-tagsa nila ka mga dibisyon - 51 niini sa women's 21 Under nga gipangulohan sa defending champion Catmon ug 47 sa men's class,

Isip usa ka developmental leaque, ang mga varsity players gidid-an pagsalmot sa kompetisyon.

Pinaagi niini, ang CEVA nanghinaut nga makadiskubre og bag-ong talento ug mahatagan ang mga batan-ong atleta og oportunidad nga mosidlak.

Sa laing bahin, ang aksiyon sa Cluster 1 ipahigayon karong Oktubre 7-8 didto sa Argao ug pagasundan kini sa kumbati sa Cluster 2 karong Oktubre 14-15 didto sa Dalaguete.

Ang Dumanjug maoy mo-host sa mga duwa sa Cluster 3 karong Oktubre 21-22, ug dayon ang San Remigio alang sa Cluster 4 karong Nobiembre 4-5.

Ang pinaksitay sa Cluster 5 adto mahitabo sa Madridejos, isla sa Bantayan sa Nobiembre 11-12 samtang ang Cluster 6 adto sa Tudela, isla sa Camotes sa Nobiembre 18-19.

Ang eliminasyon mahuman sa Cluster 7 didto sa Carmen sa Nobiembre 25-26.

Ang dakbayan sa Talisay mo-host sa quarterfinal round sa Disiembre 2-3 samtang ang semifinals ug ang kampiyonato gikatakda sa Disiembre 15-17 balik didto sa Mandaue.