CEBU, Philippines — Si National Master Rogelio Enriquez Jr. milugwa nga kampiyon sa 1st Councilor Rey Gealon Open Chess Tournament niadtong Dominggo didto sa Robinsons Galleria Cebu.
Gihuman ni Enriquez ang siyam ka hugna nga kompetisyon bitbit nag labing taas nga 8.5 puntos aron sakmiton ang titulo nga nagtangag og P8,000 nga ganti.
Si Enriquez, nga usa sa mga sinaligan sa Toledo City Trojans sa Professional Chess Association of the Philippines (PCAP), mibuntog nilang Adina Vera Kwan, Niko Dioquino, Maria Kristine Lavandero, Diego Abraham Caparino, Crisanto Tan Jr., Anthony Makinano, Allan Pason, ug NM Merben Roque. Ang wala niya mapilde mao lamang si Chris Aldritz Pondoyo kay nagtabla sila sa ikaupat nga hugna.
Sa laing bahon, si Aaron John Resma mibulsa og P5,000 sa pagtapos niini sa ikaduhang dapit uban ang 8.0 puntos. Sila si Makinano ug Pason parehong mitali og 7.5 puntos apan si Makinano maoy mipahiluna sa ikatulong puwesto tungod sa mas taas niining tiebreaker.
Sila si John Dave Lavandero, Michael Pinar, ug NMs Merben Roque, Rommel Ganzon ug Mario Mangubat ang mi-okupar sa ikalima ngadto sa ikasiyam nga dapit uban ang 7.0 puntos matag usa.
Si Chris Aldritz Pondoyo mitali og 6.5 puntos aron pagkumpleto sa top 10 ning torneyo nga giorganisa ni Cebu City Councilor Rey Gealon inabagan sa Cebu Executives and Professionals Chess Association (CEPCA) nga gipangulohan sa dugay na kaayo nilang presidente nga si Engr. Jerry Maratas.